Во 2020 година е забележан најмал број на жртви во сообраќајки (125), а трендот на опаѓање продолжил и 2021, соопштија од МВР.
Според статистиките, во периодот од 1 јануари до 15 април 2021 година бројот на сообраќајни незгоди е намален за 12 отсто во однос на истиот период лани, а бројот на жртви за 14 проценти.
Намалувањето на бројките, според МВР, се должи на засилените контроли на патиштата што ги спроведува полицијата изминатиот период.
„Евидентно е дека имаме намалување на бројот на сообраќајни незгоди во периодот кога овие контроли се спроведуваат. Покрај сообраќајните контроли, спроведуваме и превентивни акции со цел да ја зголемиме сообраќајната култура. Од минатиот месец заеднички со Републичкиот совет за безбедност во сообраќајот ја почнавме кампањата за користење на сигурносен појас, а во тек се и други превентивни активности“,
вели портпаролот на МВР, Тони Ангеловски.