Овие електронски пораки, според полицијата, се класичен обид за измама во кој целта на измамниците е да дојдат до личните податоци на граѓаните, со цел нивна понатамошна злоупотреба
Министерството за внатрешни работи (МВР) апелира граѓаните да не отвораат и да не враќаат на пораки кои се испраќани во име на директорот на Бирото за јавна безбедност (БЈБ), Александар Јанев, бидејќи се лажни.
Како што велат од Министерството, им пристигнуваат пријави од граѓани за добиена електронска порака, наводно во име на директорот на Бирото за јавна безбедност, Александар Јанев. Во лажните пораки се даваат насоки за 24 часа примачот да оди во полициска станица или да испрати повратен мејл бидејќи е предмет на кривични истраги за низа кривични дела, како детска порнографија, педофилија и трговија со дрога.
„Целта на измамниците е примачот на пораката да се регистрира преку маил и да ги даде неговите лични податоци“,
велат од МВР.
Оттаму ги известуваат граѓаните дека станува збор за лажна порака што не е испратена од страна на БЈП – МВР, ниту од Одделението за киберкриминал и безбедност.
„Овие електронски пораки се класичен обид за измама во кој целта на измамниците е да дојдат до личните податоци на граѓаните, со цел нивна понатамошна злоупотреба. Покани до граѓаните за истражни постапки од страна на МВР не се испраќаат преку имејл-адреси. Доколку внимателно се прочитаат овие пораки, можат веднаш да се забележат грешки во текстот, во однос на тоа дека е направен лош превод на текстот, со што смислата на содржината на пораката е сомнителна“,
информираат од полицијата.
МВР апелира до граѓаните да не ги отвораат овие пораки, да не се контактира испраќачот и да не се споделуваат личните податоци.
Се предупредува и да не се отвораат линкови и датотеки испратени во прилог на која било електронска порака што доаѓа од непознат испраќач.
Од МВР вчера информираа дека се испраќаат лажни СМС и електронски пораки кои наводно се во име на системот „Безбеден град“, со цел да се извлечат пари и лични податоци од граѓаните.