Зошто новите четири години би биле поразлични од претходните три, праша новиот пратеник на опозициската партија
ВМРО-ДПМНЕ ќе биде силна парламентарна опозиција и ќе понуди нов концепт на дејствување што ќе биде препознаен од граѓаните, најави од собраниската говорница Тимчо Муцунски, секретар за меѓународна соработка на опозициската партија.
Тој беше последниот говорник од редот на пратениците на седницата за избор на новата Влада на СДСМ и ДУИ, пред завршното обраќање на мандатарот Зоран Заев.
„Во новата Влада влегуваат истите министри кои во последните три години ширеа лажни надежи за неселективна правда, додека заткулисно влијаеа врз судството, зборувавте за Европа и нејзините вредност, а не ги почитувавте мислењата на Венецијанската комисија, говоревте за враќање на младите, а продолжија иселувањата, додека оние кои останаа живеат посиромашно. Зошто тогаш новите четири години би биле поразлични од претходните три. Како да ви веруваме, кога се она што го ветивте не го исполнивте, туку владеевте без почитување на основните демократски вредности“,
рече Муцунски.