„Ги поддржуваме сите постоечки напори за постигнување праведен и траен мир во Европа, останувајќи доследни во споделувањето на заедничкиот товар преку продолжување на севкупната поддршка за Украина, вклучително и во воениот и одбранбениот аспект“, рече министерот Муцунски
ФОТО: Министерство за надворешни работи и надворешна трговија
Како држава, остануваме целосно усогласени со заедничката надворешна и безбедносна политика на Европската Унија. Нашата 100-процентна усогласеност не е само техничка обврска, туку и јасен одраз на нашата стратешка ориентација и споделени вредности. Ова го истакна министерот за надворешни работи и надворешна трговија, Тимчо Муцунски, денеска во Скопје, на отворањето на Првиот дијалог за безбедност и одбрана меѓу Европската Унија и Република Северна Македонија.
Настанот, кој се одржа во рамките на официјалната посета на високата претставничка на ЕУ за надворешни работи и безбедносна политика, Каја Калас, го означи почетокот на поинтензивна соработка на полето на безбедноста и одбраната, согласно Партнерството потпишано во ноември 2024 година.
Состанокот во Министерството за надворешни работи и надворешна трговија беше отворен од министерот Муцунски, високата претставничка Каја Калас, и министерот за одбрана, Владо Мисајловски. Муцунски ја нагласи силната одлучност и посветеност на Северна Македонија да биде доверлив партнер на ЕУ и НАТО во справувањето со безбедносните предизвици во сложеното геополитичко опкружување.
„Ги поддржуваме сите постоечки напори за постигнување праведен и траен мир во Европа, останувајќи доследни во споделувањето на заедничкиот товар преку продолжување на севкупната поддршка за Украина, вклучително и во воениот и одбранбениот аспект“,
додаде Муцунски.
Преку отворен и конструктивен дијалог, двете страни размениле мислења за регионалните безбедносни прашања и војната во Украина. Била нагласена и важноста на регионалната стабилност и улогата на Северна Македонија, како членка на НАТО и земја кандидат за ЕУ, во зајакнувањето на европската безбедносна архитектура.
На средбата, како што информираат од Министерството, бил направен пресек на активностите поврзани со учеството на државата во мисиите и операциите во рамките на Заедничката безбедносна и одбранбена политика на ЕУ, како и на тековните активности за справување со сајбер и хибридни закани, стратешката комуникација, борбата против дезинформациите и странските влијанија, како и учеството на жените во овие процеси.
„Македонската страна изрази силен интерес за продлабочување на соработката со ЕУ во одбранбените иницијативи, вклучително и преку Европската агенција за одбрана (EDA), Постојаната структурална соработка (PESCO), воената мобилност и претстојната Бела книга за европска одбрана. Како земја членка на НАТО, Северна Македонија е јасно позиционирана за зајакнување на соработката меѓу ЕУ и НАТО во актуелното безбедносно опкружување“,
се додава во соопштението од министерството.
Министерот за одбрана Владо Мисајловски, на отворањето на Првиот дијалог, ја истакнал посветеноста на Европската Унија „која ја препозна искрената заложба на Северна Македонија во однос на зачувување на стабилноста, мирот и безбедноста на регионот и пошироко“. Тој упатил благодарност за поддршката од страна на Унијата наменета за македонската Армија.
„Во моментов имаме најголем буџет за одбрана, над 30 проценти се наменети за модернизација на Армијата, и оваа опрема дополнително ќе влијае на развојот на способностите и капацитетите на одбранбените капацитети“,
рече Мисајловски.
Овој прв Дијалог за безбедност и одбрана меѓу Република Северна Македонија и Европската Унија означи почеток на редовни политички и експертски консултации, со што ќе се овозможи следење на спроведувањето на Партнерството и отворање нови можности за соработка во интерес на мирот, стабилноста и безбедноста на граѓаните.
Високата претставничка на Европската Унија за надворешни работи и безбедносна политика, Каја Калас, денеска беше во официјална посета на Северна Македонија, во рамки на нејзината тридневна турнеја низ Западен Балкан.
Калас имаше средба со премиерот Христијан Мицкоски, а по неа рече дека разговарале за за потенцијалните механизми за надминување на пречките во преговорите, но не сакаше да открие повеќе детали.
Сметам дека има можност да направиме нешто – рече високата претставничка на Европската Унија за надворешни работи и безбедносна политика Каја Калас на денешната прес-конференција во Скопје прашана дали и кои се механизмите на Брисел за конечна деблокада на интеграцијата на С Македонија во ЕУ.
Според премиерот Мицкоски, присуството на Калас денеска во Скопје е значајна порака дека Европската Унија не го заборава овој регион и дека постои легитимен интерес за нашите состојби и нашите заложби.
На средбата премиерот посочи дека разговарале отворено, како што им доликува на партнери што се стремат кон заедничка иднина.
Премиерот посочи и дека во разговорите со Калас побарал фер третман и доследност во процесот, во насока Европа да покаже лидерство што ќе донесе нешто вредно за граѓаните во реалност, но и да ја врати довербата во европската идеја, особено кај младите.