Пристапот на Филипче не носи сигурност, туку неизвесност за правецот во кој треба да оди државата – реагира министерот за надворешни работи
Венко Филипче зборува за уставни измени од една страна, а за откажување од преговорите ако има ново нето од друга. Од нас нема да слушнете едно пред камера, а друго зад затворени врати.
Ова е реакцијата на министерот за надворешни работи, Тимчо Муцунски, на денешната изјава на лидерот на СДСМ, Венко Филипче кој ја критикуваше власта на чело со премиерот Христијан Мицкоски дека не се подготвени за одблокирање на евроинтеграциските процеси.
„Таков пристап не носи сигурност, туку неизвесност за правецот во кој треба да оди државата. Изминатите години видовме што значи политика на брзи потези и празни ветувања. СДС и ДУИ со секое ветување отвораа надеж, а со секој притисок ја поништуваа таа надеж. Заедничките документите што се носеа во Собранието не донесоа сила, туку слабост – беа дерогирани веднаш штом ќе се појавеше предизвик“,
пишува Муцунски на Фејсбук.
Тој вели власта работи на долготрајни решенија не на нови блокади и затоа е подобро да се покаже трпение и мудрост, отколку да се направи потег кој утре ќе биде уште поголем товар за државата.
„Има уште една важна разлика. За нас, европската иднина не е празна фраза – таа значи борба против корупцијата, модерна администрација, дигитализација, инвестиции во патишта, инфраструктура и нови можности за граѓаните. Ние веруваме дека резултатите дома создаваат почит надвор“,
пишува Муцунски.
Претходно денеска, Филипче рече дека неговата партија ќе изготви документ кој ќе го достави во текот на работната недела до Собранието, кој ќе придонесе за одблокирање на евроинтеграциите во услови кога соседните држави Албанија и Црна Гора бележат напредок, а Македонија не.