Министерот за Европа и надворешни работи на Франција, Жан-Ноел Баро, ја реафирмирал цврстата поддршка за пристапниот процес на земјава, истакнувајќи дека Франција ќе продолжи да се залага за проширување на Европската Унија, активно придонесувајќи за остварување на целта за приклучување на земјава кон ЕУ
Министерот за надворешни работи и надворешна трговија Тимчо Муцунски, кој е во работна посета на Париз, денеска остварил средби со францускиот министер за Европа и надворешни работи Жан-Ноел Баро и со Бенџамин Хадад, француски министер делегиран за Европа. На средбите, како што информира Муцунски, била потврдена силната и значајна поддршка на Франција за македонските евроинтеграции.
Министерот за Европа и надворешни работи на Франција, Жан-Ноел Баро, ја реафирмирал цврстата поддршка за пристапниот процес на земјава, истакнувајќи дека Франција ќе продолжи да се залага за проширување на Европската Унија, активно придонесувајќи за остварување на целта за приклучување на земјава кон ЕУ.
„Заеднички изразивме задоволство од развојот на билатералните односи и разговаравме за понатамошна цврста и продлабочена соработка меѓу двете земји – како на политичко, така и на економско ниво, преку зајакнување на соработката помеѓу компаниите и владите“,
информира Муцунски по средбата со својот француски колега.
На средбата со францускиот министер делегиран за Европа, Бенџамин Хадад, било разговарано за напредокот на С Македонија на патот кон ЕУ, како и за актуелната политичка состојба во регионот.
„Ја нагласив цврстата посветеност на државата на реформите и полноправното членство во Унијата, како и нашиот принципиелен став во однос на европските интеграции, заснован на предвидливост, кредибилитет и јасни правила во процесот“,
додава македонскиот министер за надворешни работи и надворешна трговија.