Билатералните разлики, блокадата на европскиот пат на државата од страна на Бугарија и положбата на македонското малцинство во Бугарија биле меѓу темите на кои, во Минхен, разговарале шефовите на дипломатиите
Министерот за надворешни работи и надворешна трговија Тимчо Муцунски во рамките на Минхенската безбедносна конференција денеска разговараше со бугарскиот колега Георг Георгиев за билатералните разлики, блокадата на европскиот пат на државата и положбата на македонското малцинство во Бугарија, соопштија од МНР.
„Министерот Муцунски изрази жалење што, наместо развој на добрососедската политика, односите меѓу двете земји остануваат оптоварени со билатерални спорови, кои станаа непринципиелна пречка на македонскиот евроинтеграциски процес. Притоа, тој истакна дека сите отворени прашања треба да се решаваат одговорно, преку дијалог и со заемна почит и разбирање“,
се вели во соопштението од македонското МНР.
Тој посочил дека добрососедските односи подразбираат и поддршка во рамките на интеграциите.
Министерот Муцунски на средбата го отворил и прашањето за почитување на правата и слободите на припадниците на македонското малцинство во Бугарија и ја нагласил потребата од спроведување на одлуките на Европскиот суд за човекови права.