На американскиот државен секретар му е посочена и отвореноста на македонската влада кон унапредување на економската соработка, привлекување американски инвестиции и зголемување на присуството на американски компании во земјата
Министерот за надворешни работи и надворешна трговија Тимчо Муцински денеска во Стејт департментот во Вашингтон оствари средба со државниот секретар на Соединетите Американски Држави (САД), Марко Рубио, на која ја потврдија силната стратешка поврзаност меѓу двете земји, заедничката заложба за регионалната стабилност, нашата европска интеграција, како и инвестициите во безбедноста и одбраната како сојузници во НАТО.
„Од секретарот Рубио и во име на американската администрација, добивме цврсто уверување дека нашето партнерство и сојузништво остануваат клучни, гледајќи ја нашата земја како значаен фактор за регионалната стабилност. Меѓу другото, разговаравме за следните чекори во рамките на Стратешкиот дијалог и меѓусебната соработка“,
вели Муцунски од Вашингтон.
Министерот Муцунски ја нагласи посветеноста на македонската влада кон унапредување на политичкиот дијалог со САД, како и конкретната заложба за институционализирање на стратешкото партнерство преку спроведување на заеднички Акционен план.
„Во рамките на разговорот беа разгледани можностите за дополнително продлабочување на трговските односи, постигнувајќи значаен исчекор и напредок во насока на намалување на тарифите и можноста за започнување на процес за потпишување Договор за слободна трговија“,
се вели во соопштението на Министерството за надворешни работи и надвореешна трговија (МНР).
Муцунски на Рубио му ја посочил и отвореноста на македонската влада кон унапредување на економската соработка, привлекување американски инвестиции и зголемување на присуството на американски компании во земјата.
„Разменети беа и мислења за безбедносната соработка во рамки на НАТО, каде што нашата држава продолжува да дава активен придонес како кредибилен сојузник, со инвестиции над 2 отсто од БДП во одбранбениот сектор. Особено внимание беше посветено на регионалната стабилност и развојот на Западен Балкан“,
пишува во извештајот од МНР.
Министерот посочи и дека поддршката од САД продолжува со засилен интензитет, особено во реформските процеси, зајакнувањето на демократијата, владеењето на правото и борбата против корупцијата.
„Во време на сложени безбедносни предизвици со кои се соочува светот, заклучивме дека од клучно значење е да продолжиме да работиме на одржување на мирот, стабилноста и просперитетот на глобално ниво“,
посочи Муцунски по средбата со Рубио.
Воедно во рамки на посетатата на Вашингтон, Муцунски се сретна и со трговскиот претставник во администрацијата на американскиот претседател Доналд Трамп, Џејмисон Гриер, со кого зборувал за значајниот напредок во преговорите за тарифите.
„Ги разглдавме и можностите за потпишување на договор за трговија и ги презентиравме владините политики за привлекување на американски инвестиции и зголемено присуство на американски компании во нашата земја“,
кажа министерот.
Муцунски на почетокот на април имаше куса средба со Рубио на маргините на состанокот на шефовите на дипломатиите на земјите членки на Алијансата во Брисел.
Во објава на социјалните мрежи, министерот тогаш рече дека со Рубио имале кратка, но многу продуктивна средба.
Шефот на македонската дипломатија деновиве престојува во САД по повод одбележувањето на 30-годишнината од потпишувањето на Дејтонскиот мировен договор, во рамки на Пролетната сесија на Парламентарното собрание на НАТО.