Претседателот на Владата, Христијан Мицкоски, од собраниската говорница ги образложи предлозите, нагласувајќи дека овие именувања се клучни за функционално екипирање на Владата и обезбедување континуитет во важните ресори
Мухамед Хоџа е новиот министер за животна средина и просторно планирање, а Беким Сали го презеде ресорот евроинтеграции. Новите министри беа избрани на денешната собраниска седница.
Претседателот на Владата, Христијан Мицкоски, од собраниската говорница ги образложи предлозите, нагласувајќи дека овие именувања се клучни за функционално екипирање на Владата и обезбедување континуитет во важните ресори.
За Мухамет Хоџа, премиерот истакна дека неговото долгогодишно искуство во државната управа и во извршната власт подразбира институционална стабилност во ресорот животна средина, кој е клучен за одржливиот развој.
За Беким Сали, пак, Мицкоски посочи дека неговото претходно министерско и пратеничко искуство е од клучно значење за Министерството за европски прашања, каде е потребна систематска работа, усогласување на институциите, и следење на обврските што произлегуваат од националните и европските документи.
„Наш приоритет е стабилно функционирање на институциите, доследно спроведување на реформите и создавање услови за подобар квалитет на живот на граѓаните. Секој член на Владата има јасна обврска да работи професионално, отчетно и во рамките на Уставот и законите, со цел да се обезбеди доверба во институциите и континуитет во државните политики“,
истакна Мицкоски.
Пред изборот на новите министри, Собранието го разреши досегашниот министер за европски прашања, Орхан Муртезани, а дел од пратениците дебатираа за неговата смена.
Халил Снопче од Алијанса за Албанците праша зошто Муртезани не си поднел оставка доколку постоел договор, сугерирајќи дека разрешувањето е порака за неуспехот на Владата.
Јованка Тренчевска од СДСМ го нарече процесот „политички театар“, упатувајќи критики за економската состојба, растот на цените и застојот во евроинтеграциите.
Изборот на новите членови на Владата дојде по локалните избори одржани во октомври откако Изет Меџити стапи на градоначалничката функција во Општина Чаир, кој ги извршуваше функциите прв вицепремиер и министер за животна средина и просторно планирање.