Ова, како што се наведува, е негов прв партиско-политички ангажман, чија цел е да даде позитивен придонес и да остави добар траг и во оваа област
Првиот вицепремиер и министер за животна средина и просторно планирање Изет Меџити, кој е кандидат за градоначалник на Општина Чаир од редовите на ВЛЕН, денеска го објави името на носителот на листата за советници за оваа скопска општина, со која коалицијата ќе настапи на локалните избори во октомври.
Како што објави Меџити на Фејсбук, станува збор за докторот и активист од граѓанскиот сектор, Мухамед Муртези.
„Денес сакам да го претставам носителот на листата на советници на ВЛЕН за Општина Чаир, докторот, интелектуалецот, активистот на граѓанското општество и човек со високи вредности, Мухамед Муртези. Заедно кон големата победа. Само за тебе Чаир“,
напиша Меџити на социјалната мрежа.
Според соопштението од изборниот тим на Меџити, д-р Муртези, како носител на листата за советници на ВЛЕН за Општина Чаир е и кандидат за претседател на Советот на Општината.
Ова, како што се наведува, е негов прв партиско-политички ангажман, чија цел е да даде позитивен придонес и да остави добар траг и во оваа област.
Покрај претставувањето на носителот на листата за советници на ВЛЕН за Чаир, Меџити на својот фејсбук-профил објави и видеообраќање на Муртези, во кое тој вели дека заедно со кандидатот за градоначалник ќе понудат поквалитетно образование, поразвиена култура и подобар и подостоинствен живот во скопски Чаир.
„Нашата визија, заедно со идниот градоначалник на Чаир, Изет Меџити, е еден поубав, почист и побезбеден Чаир. Поквалитетно образование и наука, поразвиена култура и спорт, подобар и подостоинствен живот. Затоа што жителите на Чаир го заслужуваат тоа и јас верувам дека ова е остварливо со добра волја, голема посветеност и чесна работа. Затоа ја бараме вашата поддршка на 19 октомври. За нашиот Чаир“,
вели д-р Муртези.
Во своето обраќање тој дава и краток осврт на неговата биографија, а за која информираа и од изборниот тим на Меџити.
Во соопштението оттаму, се вели дека Муртези е роден и израснат во Скопје. Студиите ги завршил на Медицинскиот факултет при Универзитетот во Приштина, додека магистерските студии на Универзитетот „Св. Кирил и Методиј“ во Скопје, на Филозофскиот факултет, насока Европски студии за интеграција.
Од 1991 година, како што се наведува, е активен дел од граѓанското општество. Бил претседател на Сојузот на исламска младина, Здружението на албански издавачи и Центарот за разбирање и институционална соработка. Исто така, е главен и одговорен уредник на едукативно-културното списание ВЕПРА и главен уредник на меѓународното научно списание CENTRUM. Коосновач е и директор на Издавачката куќа „Фуркан ИСМ“.