Родителите на децата со попреченост не се ограничени со возраста на нивните деца за да можат да отсуствуваат од работа поради коронавирусот, информираат од Министерството за труд и социјална политика.
За нив максималната граница од 10 годишна возраст нема да важи, а еден од родителите ќе може да отсуствува од работа ако прикаже потврда дека лицето со попреченост посетува некој од дневните центри, кои поради коронавирусот од вчера не работат.
„Во однос на прекинот на работата на дневните центри за згрижување на лица со попреченост, укажуваме дека ослободувањето од работни активности на родители на деца/лица со попреченост е проширено на родители на деца и млади и над 10-годишна возраст. Родителите е потребно по истиот принцип наведен погоре да достават потврда дека лицето е корисник на услугата дневен центар за лица со попреченост“,
велат од МТСП.
Од таму објаснуваат дека ослободувањето од работни обврски важи за родител на лице со попреченост кое досега користело некоја од услугите на МТСП за лица со попречености, па останува нејасно што е со оние кои не посетуваат ниту дневен центар, ниту се дел од редовното образование.
Од МТСП во соопштението дополнително апелираат сите вработени и работодавачи строго да се придружуваат до мерките за превенција од ширење на коронавирусот. Секое непочитување на препораката за ослободување од работни обврски на еден од родителите на деца до 10 годишна возраст апелираат да се пријави во Државниот инспекторат за труд на телефонскиот број 151 31.
Отсуствата од работа ќе се докажуваат со потврди кои ќе ги издаваат градинките и основните училишта, на име на родителот корисник на мерката за ослободување од работа поради грижа за дете со навршена возраст до 10 години, во кои ќе биде наведен и временскиот период за кој се однесува. Истите ќе треба да се достават до секторот за управување со човечки ресурси или раководителот/директорот на институцијата/компанијата во која работи, до терминот за пресметка на следната плата.