Европската унија на почетокот на овој месец прогласи 19 вработени во Постојаната мисија на Русија во Унијата за „персона нон грата“
Москва денеска најави протерување на 18 дипломати од мисијата на Европската унија во Русија. Одлуката доаѓа како одговор на сличен потег преземен од Брисел по офанзивата на Кремљ во Украина.
„Како одговор на непријателските дејствија на Европската унија, 18 членови на Делегацијата на ЕУ во Русија се прогласени за персона нон грата и мора да ја напуштат руската територија што е можно поскоро“,
се вели во соопштението на руското Министерство за надворешни работи.
Европската унија ја осуди одлуката на МОсква за протерувањето нарекувајќи ја „неоснована“.
„Европската унија изразува жалење за неоправданата, неоснована одлука на Руската Федерација да протера 18 членови на Делегацијата на Европската унија во Руската Федерација. Дипломатите на ЕУ за кои станува збор ги извршуваат своите функции во рамките и целосно почитувајќи ја Виенската конвенција за дипломатски односи“,
изјави портпаролот на ЕУ за надворешни работи Петер Стано.
Стано ја нарече одлуката на Русија „чист одмазднички чекор“ што „дополнително ќе ја продлабочи нејзината меѓународна изолација“.
„Европската унија продолжува силно да ја повикува Русија да престане со својата агресија врз Украина и да се врати на почитување на меѓународните правила и на кооперативен пристап во нејзините меѓународни односи“,
рече тој.
Европската унија на почетокот на овој месец прогласи 19 вработени во Постојаната мисија на Русија во Унијата за „персона нон грата“.