Она што Евростат го налага за земјите членки на ЕУ и државите кандидати е пописот да биде спроведен во 2021 година. Ние мораме да направиме попис, не заради Евростат, ниту за Обединети нации, туку заради нас. На оваа држава ѝ требаат податоците, ги немаме 18 години. Ние 18 години планираме без информации, рече Апостол Симевски, директор на Државниот завод за статистика (ДЗС), во неговото гостување на ТВ 24.
Тој истакна дека неспорно е отивсе доцни со донесувањето на законот, но дека сè уште има можност да се спроведе. Сите подготовки течат и трошењето на финансиските средства оди независно од законот.
„Буџетот и трошењето на средствата не се врзува со носењето на законот. Набавена е целата опрема, таа е во Заводот, софтверското решение е завршено. Она што ни е важно и врзано со законот, е организацијата на теренот. Треба да се формираат реонските пописни комисии кои ќе имаат логистичка улога“,
вели Симевски.
Со пописот, нагласи тој, ќе бидат опфатени три алинеи: државјани на Северна Македонија кои имаат живеалиште или престојувалиште во државата, без разлика дали се тука или во странство во моментот на пописот; странски државјани кои престојуваат во државата со одобрение на престој и лица без државјанство кои во моментот на спроведување на пописот се затекнати во државата.