„Националниот консензус треба да се изгради околу гаранциите. Мора да имаме некакви гаранции и има многу варијанти за нив. Нашиот преседан не е само важен за нас, туку и за сите други кандидати за членство во ЕУ“, кажа таа
Претседателката Гордана Сиљановска-Давкова во гостување на емисијата „Само вистина“ на ТВ Канал 5 рече дека националниот консензус на кој повика во нејзиното годишно обраќање во Собранието, треба да се изгради околу гаранциите да нема нови условувања во процесот на евроинтеграциите.
„Консензус треба да има околу тоа дека не смее да има двојни стандарди за членство во ЕУ. Конзунзус треба да има околу тоа дека ние сме рекордер по уставни измени по барање на ЕУ, дури и името го сменивме без да постои консензус, но не добивме почеток на преговори. Консензус треба да има за тоа дека ако се повикуваме на принципи, тие треба да важат за сите“,
рече таа.
Според неа, мораме да добиеме гаранција дека нема некој да не турка да расправаме за идентитетски прашања, бидејќи тоа е темелна вредност на ЕУ.
„Националниот консензус треба да се изгради околу гаранциите. Мора да имаме некакви гаранции и има многу варијанти за нив. Нашиот преседан не е само важен за нас, туку и за сите други кандидати за членство во ЕУ“,
кажа претседателката.
Посочи дека и високи европски претставници укажале на тоа дека се потребни гаранции и дека ветото треба да се урне.
„Тврдам дека дури и во случајот со државите од Западен Балкан, кои се најбрзо натаму може да се случи повторно да има вето“,
смета Сиљановска-Давкова.
Која било членка ЕУ, како што вели, може да покрене постапка против Бугарија, за кршење на основните принципи и вредности.
„Ако ги читате извештаите и ги гледате евалуациите, ќе видите дека ние за Зелената агенда сме вреднувани исто како и Молдавија, но таа добива средства, а ние не“,
вели таа.
Повтори дека ако сака, ЕУ може да најде решение за нашата држава, со цел да не држи во кондиција.
„Но, зошто не сака? Зашто е практична, прагматична и зашто некој се согласил. Доколку тие што сега предлагаат резолуции и слично, поинаку мислеле и го предочиле ова што го зборувам, тогаш во предвид ќе го зеле и оние што одлучувале. Ама тие ги убедувале дека ова е сосема добро решение и да се сетиме, тогаш ни велеа уште ова и готово е, ние ги почнуваме преговорите“,
рече претседателката.
Претседателката во нејзиното годишно обраќање пред пратениците, кое траеше повеќе од еден час, повика на национален консензус околу стратешките цели на државата за евроинтеграциите, посочувајќи дека тие не се само административен процес, туку политички предизвик кој бара уставни измени и јасни гаранции од Европската Унија и од Бугарија.
„За да продолжат преговорите меѓу Македонија и Европската Унија, потребна е политичка волја, наша, но и на Унијата. Ние сме предложиле повеќе политички решенија, а ЕУ треба да избере едно од нив или да најде самата решение. Ако можеше да го да го направи тоа за Украина и Молдавија, може и за нашата држава“,
рече претседателката пред пратениците.