Министерството за образование и наука продолжува со подготовката на дигиталните материјали за учење и покрај повлекувањето на предлог-законот за учебници од собраниска процедура, информираат од МОН во соопштение до јавноста.
„Новите материјали за учење се изработуваат согласно усвоените нови наставни програми кои треба да обезбедат поголема интерактивност за време на наставата и да го поттикнат креативното и критичко размислување кај учениците. Сите промени во основното образование се предвидени со новата Концепција, усвоена преку широка јавна дебата при што предвид е земено мислењето на сите засегнати чинители, а особено и на експертската јавност“,
се вели во соопштението.
Од МОН информираат дека со цел да се види подготвеноста на училиштатата за имплементација на реформите денеска министерката Мила Царовска одржа редовен состанок со градоначалниците, директорите на училиштата и задолжените лица за образование во локалните самоуправи.
Тема на разговор на состанокот беше имплементацијата на новите наставни програми за прво и четврто одделение кои согласно новата Концепција за основно образование треба да стартуваат од 1 септември годинава.
„На состанокот беа споделени информации за техничката подготвеност со опрема со која располагаат училиштата, неопходна за успешна реализација на зацртаните реформи. Исто така, градоначалниците и директорите истакнаа дека интензивно се подготвуваат и заедно со МОН ќе обезбедат навремен почеток на учебната година и спроведување на новите наставни програми“,
се вели во соопштението на МОН.