„Продолжуваме будно да ја следиме состојбата со ковид во училиштата, која засега е стабилна и верувам дека со доследно почитување на мерките училиштата ќе останат безбедни и што подолго отворени за учениците“, вели министерката Царовска
На дневно основа бројот на новозаразени ученици се движи од 0,01 до 0,03 отсто од вкупно 240 илјади ученици, соопштија од Министерството за образование и наука (МОН) оценувајќи го ова како исклучително низок процент.
Кога станува збор за процесот на имунизација во образовниот систем, пак, податоците од ресорното Министерство се дека над 72 отсто од наставниот кадар е вакциниран.
Податоците МОН ги соопшти по денешната средба на министерската Мила Царовска со директорите на училиштата во Битола, на кој таа оцени дека учебната година се одвива според посакуваното.
„Пред нас е учебна година која на најголема радост на учениците ја започнавме со физичко присуство, но и година во која имплементираме целосно нови наставни програми во прво и четврто одделение. Досега целиот овој процес тече според предвидениот план и динамика за што сте заслужни вие директорите и локалните самоуправи кои посветено работевте навреме да ги подготвите училиштата и да ги обезбедите потребните услови со цел да имаме успешна учебна година. Би сакала да се заблагодарам и на наставниците кои ги поминаа потребните обуки и веќе се приспособуваат на новиот концепт. Исто така, сите заеднички продолжуваме будно да ја следиме состојбата со ковид во училиштата, која засега е стабилна и верувам дека со доследно почитување на мерките, училиштата ќе останат безбедни и што подолго отворени за учениците“,
рече Царовска.
Од МОН додаваат и дека, според тоа што било констатирано на состанокот, образовниот систем е подготвен и доколку се јави потреба да се премине на резервните сценарија, меѓу кои и онлајн-настава.