Оттаму велат дека вкупно 366 основни општински училишта и 109 јавни средни училишта добиваат поддршка од државата заради непречена работа и „реализација на мисијата заради која и постојат – едукација на младите“
Министерството за образование и наука (МОН) денеска преку соопштението истакна дека владината мерка за снабдување на училиштата со електрична енергија по субвенционирана цена од 95 евра за мегават-час е голема поддршка за непречено организирање на наставата со физичко присуство во училниците.
Оттаму велат дека вкупно 366 основни општински училишта и 109 јавни средни училишта добиваат поддршка од државата заради непречена работа и „реализација на мисијата заради која и постојат – едукација на младите“.
„Во услови на прогласена кризна состојба, со склучување на договор за снабдување со електрична енергија со ЕСМ Продажба, тие ќе создаваат значително помали расходи во општинските и државниот буџет, со што се зголемува сигурноста дека воспитно-образовниот процес во училиштата ќе продолжи да се реализира непречено до крајот на годината“,
велат од МОН.
Од Министерството апелираат владините препораки за рационално користење на електричната енергија доследно да ги почитуваат сите образовни институции и установи.
„Затоа што штедењето на електричната енергија е еден од факторите кои влијаат на одржливоста на наставата во училниците, но од друга страна се подигнува стабилноста на енергетскиот систем и се обезбедува доволно електрична енергија за потребите на домаќинствата“,
потенцираат оттаму.
Владата на почетокот на октомври, годинава донесе сет мерки за олеснување на набавката на електрична енергија за јавните, образовните и здравствените институции.
Мерките предвидуваат вклучување на основните и средните училишта на регулиран пазар за снабдување со електрична енергија, потоа снабдување на јавните здравствени установи со електрична енергија, преку продажба од ЕСМ по поповолна цена од пазарната и снабдување со електрична енергија на мерни станици за водни пумпи, преку продажба од ЕСМ по поволна цена од берзанската, односно субвенционирање на разликата во цената на струјата.