„Има одредени работи што треба да им ги обезбедиме на нашите граѓани. Ако ја оставиме земјата без гориво и ја дестабилизираме ситуацијата овде, тоа нема да помогне никому“, рече претседателката на Молдавија, потенцирајќи ја големата зависност на земјата од рускиот гас
Владата во Молдавија ќе го задржи неутралниот став и нема да се приклучи на санкциите на Западот против Русија поради конфликтот во Украина, изјави претседателката Маја Санду.
„Има одредени работи што треба да им ги обезбедиме на нашите граѓани. Ако ја оставиме земјата без гориво и ја дестабилизираме ситуацијата овде, тоа нема да помогне никому“,
рече Санду, додавајќи дека „ниту Молдавија, ниту Украина, ниту нашите западни партнери“ нема да имаат корист од таа ситуација.
Во таа насока претседателката Санду ја истакна големата зависност на Молдавија од испораките на руски гас.
„Можеме ли да си дозволиме да ја оставиме нашата земја без природен гас или струја? Не, не можеме, поради нашите граѓани и поради 100 000 украински бегалци, меѓу кои и 50 000 деца“,
рече претседателката Санду.
Според податоците со кои располага Агенцијата за бегалци на ОН (УНХЦР), од почетокот на руската инвазија, од Украина во соседна Молдавија се засолниле 391 592 бегалци.
Според молдависката претседателка, конфликтот во соседна Украина влијаел на економската ситуација во Молдавија, поради тоа што немаат пристап до пазарите на Украина, Русија и Белорусија.
„Извозот и увозот во тие земји се практично блокирани како резултат на конфликтот“,
рече таа, коментирајќи ја можноста за ограничување на извозот и увозот.