Телефонот на Катица Јанева по кој трагаше обвинителството и за кој изутрината извести дека е обезбеден, бил пронајден кај сестра на девојката на Лазар Јанев, син на специјалната обвинителка, дознава „360 Степени”. Телефонскиот апарат, сопственост на СЈО, пред извесно време бил деактивиран, а подоцна даден на користење на лицето кај кое е лоциран.
Катица имала и трет мобилен телефон
Дознаваме дека Јанева имала и трет телефон, кој синот Лазар го изгубил во Белград. Според нашите извори, тој апарат најверојатно никогаш не го користела. Инаку, девојката на Лазар Јанев е работно ангажирана во СЈО.
ОЈО за гонење организиран криминал и корупција денеска соопшти дека со издадено барање до мобилните оператори за следење на IMEI- меѓународен идентитет на мобилна опрема на телефонот, го пронашле мобилниот телефон кај друго лице. Притоа лицето изјавило дека телефонот е добиен на подарок. Пронајдениот мобилен телефон ќе биде даден на вештачење.
Ова е втор мобилен телефон кој Обвинителството ѝ го одзема на Јанева за да се види нејзината комуникација со првоосомничениот во случајот „Рекет“ Бојан Јовановски (Боки 13). Јанева засега не е осомничена во истрагата. Во нејзиното прво обраќање пред јавноста по обелоденувањето на аферата, специјалната јавна обвинителка денеска изјави дека таа се поврзува со рекетирањето бизнис-моќници бидејќи Бојан Јовановски го злоупотребувал нејзиното име.
- поврзана вест: (ВИДЕО) Јанева: Боки 13 го злоупотреби моето име