Претставниците на јапонскиот гигант гарантирале дека гасната централа ќе ја стават во функција до почетокот на 2026 година
Делегација на јапонскиот производител „Мицубиши“ ги посети АД ЕСМ и подружницата РЕК „Битола“ со цел испитување на можностите за изградба на гасна електрана со моќност од 250 MW во кругот на РЕК „Битола“, соопшти АД „Електрани на Северна Македонија“ (ЕСМ).
На средбите со Управниот одбор на АД ЕСМ и со менаџерскиот тим на РЕК „Битола“, претставниците на јапонскиот гигант, како што се посочува во соопштението, изразиле подготвеност за активно учество во изградба и на други постројки кои се предвидени во планот за трансформација на производството на електрична енергија во земјава, односно реализација на т.н. зелено сценарио во енергетиката.
„Согласно податоците што ги сподели делегацијата на ’Мицубиши‘, изминатите три години оваа јапонска компанија има вложено околу две милијарди евра во изградба на гасни централи за производство на електрична енергија. Врз основа на овие импозантни податоци, претставниците на ’Мицубиши‘ гарантираат ставање во функција на гасната централа во РЕК Битола до почетокот на 2026 година“,
велат од ЕСМ.
Делегацијата на јапонскиот гигант имала средби и со претставници на Владата од каде била изразиле подготвеност заедно со АД ЕСМ да се работи на проект за стратешко партнерство со јапонскиот производител.