Со изградбата на третата делница од пругата, Македонија ќе ја потврди целта да биде крстосница на многу значајните паневропските коридори 8 и 10, рече премиерот
Македонија започна со активности за изградба на третата делница од пругата кон Бугарија, која е дел од Коридорот 8, изјави денеска премиерот Христијан Мицкоски во Крива Паланка. Тој кажа дека откако биле отстранети пречките од минатото Владата донела одлука за активација на грант од Европската инвестициска банка како техничка поддршка за ревизија на основниот проект, по што се очекува да се објави и тендерот за извршување на градежните работи на терен.
Премиерот вели оти со изградбата на оваа делница, ќе се потврди целта на земјава да биде крстосница на многу значајни паневропски коридори, коридорите 8 и 10.
„Третата фаза е во процес на развивање, битно е дека сите пречки од минатото што се случуваа се надминати, постигната е согласност со нашиот источен сосед. Нашиот дел, би рекол со одлуката на Владата да се активира грантот што значи техничка поддршка од страна на Европската инвестициска банка (ЕИБ) значи дека и ние почнуваме со овој проект. Техничката поддршка значи ревизија на основниот проект, ревизија на целосната документација и потоа објавување јавен повик за изградба на третата фаза“,
кажа Мицкоски.
Мицкоски вели дека процесот добро напредува и очекувањата се дека Коридорот 8 ќе биде исполнет во целост, а рече и оти се во напредна фаза и за Коридорот 10, кој е дел од договорот со Обединетото Кралство, и најави убави вести во наредниот период.
Инаку, претходно од Владата информираа дека се конкретизираат работите за изградба на третата делница од пругата од Крива Паланка до границата со Република Бугарија и оти во таа насока на неодамнешната владина седница пред само неколку дена била донесена одлука да се ефектуира договорот за грант за техничка поддршка во висина од 3,7 милиони евра добиен од Европската инвестициска банка (ЕИБ).
На средината на јули македонска и бугарска делегација во Брисел одржаа заеднички состанок на кој беше најавено дека ќе биде распишан тендер за третата делница од Бугарија. За заедничкиот проект за изградба на прекуграничниот тунел меѓу Ѓуешево и Деве Баир, двете страни се договорија да формираат работни групи за финализирање на текстот на меѓувладиниот договор за отпочнување градежни работи на почетокот на следната година, а кој треба да се потпише наесен.
Од Министерството за транспорт тогаш информираа дека Европската инвестициска банка (ЕИБ) понудила подготвеност да помогне во техничките дискусии и целокупниот процес.
Средбата во Брисел, пак, беше најавена од страна на министерот за транспорт Александар Николоски по состанокот со неговиот бугарски колега Гроздан Караџов што се случи во јуни во Истанбул во рамките на форумот „Глобална транспортна поврзаност“.