„Ќе прашам јавно, зарем е можно изгубен идентитет повторно да го изгубиме? Тој ниту бил изгубен ниту ќе се изгуби. Изгубен е веројатно Мицкоски и ако некој го пронајде нека го врати во ВМРО-ДПМНЕ, ама не верувам дека и таму ќе биде нешто од помош“, изјави Заев во коментар за обвинувањата од опозицијата
Лидерот на ВМРО-ДПМНЕ Христијан Мицкоски излезе со нови обвинувања за власта во врска со преговорите со Бугарија тврдејќи дека е спремна да ги прифати барањата на бугарските политичари.
Неговата објава следува во пресрет на утрешното патување на премиерот Зоран Заев, вицепремиерот Никола Димитров, шефот на дипломатијата Бујар Османи и специјалниот претставник на Владата за Бугарија, Владо Бучковски.
„Овој квартет кој државава ја чини многу скапо ќе отпатува во Софија, каде што се спремни да дадат бел лист хартија кој бугарските политичари треба да го натоварат со барања, исти онакви какви што се содржани во бугарската декларација со која се негираат јазикот, идентитетот и историјата на Македонија. Овој квартет предводен од Зоран Заев ќе го прифати сето ова што подоцна треба да се реализира со исчекување на новата влада во Бугарија. Загрозени се националните и државни интереси, Заев им дава подарок кој многу скапо ќе ја чини нашата држава. Апелирам на внимателност на македонскиот народ, свесно и будно да не дозволиме ново предавство на квартетот Заев, Бучковски, Османи и Димитров“,
вели Мицкоски во неговата објава на социјалните мрежи.
Обвинувањата дека се подготвува предавство, беа причина и минатата недела ВМРО-ДПМНЕ да излезе на протести во неколку града и да блокираат раскрсници, а изминатите два дена, пак, да протестираат пред Министерството за надворешни работи (МНР).
Премиерот Зоран Заев, пак, во денешната изјава, коментирајќи ги обвинувањата од опозицијата, рече дека исти такви обвинувања имаше дека преку Преспанскиот договор ќе го изгубиме идентитетот.
„Ќе прашам јавно, зарем е можно изгубен идентитет повторно да го изгубиме? Тој ниту бил изгубен ниту ќе се изгуби. Изгубен е веројатно Мицкоски и ако некој го пронајде нека го врати во ВМРО-ДПМНЕ, ама не верувам дека и таму ќе биде нешто од помош“,
изјави Заев.
Тој порача дека за македонскиот јазик и идентитет не разговараат и тоа воопшто не е на маса. Како што рече, се разговара за португалскиот предлог со кој се води грижа за јазикот и идентитетот, а истовремено и за бугарските позиции.
За утрешната посета на Софија тој кажа дека е должен прво на граѓаните да им ги каже своите лични очекувања, бидејќи не сака ниту за себе ниту за народот да ги зголемува очекувањата од тоа што е реално, односно дека е тешко да се постигне договор за да се искористи првата шанса во јуни.
„Зошто е реално? Заради тоа што во Бугарија нема ниту парламент ниту има политичка влада. Фала Богу има желба за разговор и затоа ќе ја искористиме таа желба за разговори од страна на бугарската влада и ние ќе ја направиме утре посетата Бугарија каде што ќе се видиме и со лидерите на повеќе политички партии, најголемите… Се надевам дека тие ќе го прифатат тоа, а ќе се видиме со премиерот и со претседателот на државата и сите важни носители на одговорните функции“,
рече Заев.
Премиерот потенцираше дека по првата шанса за датум за меѓувладина конференција, која е на 22 јуни, односно 24 и 25 јуни, кога се одржува Европскиот совет, втората е 6 октомври за кога е закажан Европски совет за Западен Балкан во Словенија за време на словенечкото претседателство.
„Потврдивме дека заслуживме и повеќе од тоа, туку, како што реков, повеќе од јасно е дека ЕУ се чувствува должна затоа што не испорачала, ние испорачавме сè. Ние ја крепиме агендата на борбата против сите, би ги нарекол, меморандуми за промена на граници или етнички територии токму преку Северна Македонија и нашето ‘едно општество за сите’ и мултиетничка, мултирелигиозна функционална демократија и сме пример на европскиот континент за тоа. Пример сме и преку европскиот начин на решавање на проблемите во регионот. Пример, најдобри сме и во реформите, и тоа како нашиот народ заслужил да добие прва меѓувладина конференција која реков дека е само получекор во нашиот пат кон европската интеграција“,
рече Заев.
Тој и владината делегација ќе остварат работни средби со претседателот на Бугарија, Румен Радев, со премиерот на Бугарија, Стефан Јанев, како и со претставници на поголемите политички партии во Република Бугарија.