Според него, вистинската намера на опозицијата да го опструира носењето на овој закон е стравот од вложувањето на средствата во бизнисот и во општините
Премиерот Христијан Мицкоски очекува опозицијата да ја опструира работата на собраниската Комисија за финансирање и буџет на која треба да се разгледува предлог-законот за задолжување на Република Северна Македонија од 500 милиони евра кај Унгарската експорт-импорт банка, кој се носи по скратена постапка.
Мицкоски вели дека опозицијата, за која рече дека е составена од партиите Левица, СДСМ и ДУИ, дури и на недемократски начин ќе ја опструира работата на Комисијата.
„Добив информација дека денеска нема претседателот на Комисијата за финансирање и буџет оваа точка да ја стави на дневен ред, тоа е Сања Лукаревска. Таков став заземале во СДСМ. Деловникот е јасен, има таму период кога треба да се стави оваа точка, доколку не се стави, што се прави итн. Тоа ќе прави. Опозицијата, претпоставувам Левица – ДУИ – СДСМ, ќе се обидат, дури мислам дека и на недемократски начин, да ја опструираат работата на Комисијата“,
рече Мицкоски денеска одговарајќи на новинарски прашања по неговата посета на СРЦ „Бранители“ во Општина Бутел.
Според него, вистинската намера на опозицијата да го опструира носењето на овој закон е стравот од вложувањето на средствата во бизнисот и во општините.
„Вистинската намера на опозицијата е стравот бидејќи ако овие средства се вложат на начин на кој планираме да ги вложиме, ние ќе добиеме политички бенефит од сето ова и на тој начин преку реализација на проектите во општините и поддршка на бизнисот конечно, после долго време застој и уназадување, државата ќе почне да чекори напред. Тоа е вистинската суштина“,
рече тој.
Мицкоски и денеска во одговор на новинарско прашање рече дека провизиските трошоци за правни услуги што земјава треба да ѝ ги плати на независна фирма избрана од страна на Унгарската експорт-импорт банка се стандардни за ваков тип на заеми.
„Цената која ја плаќаме за оваа половина милијарда е некаде отприлика, вчера кажав, 0,1 процент, но таа е 0,014 процент и тоа е за адвокатски услуги, процес што е стандарден за ваков тип на заеми“,
додаде тој.
Премиерот, нагласувајќи дека правел анализа на тоа колкава провизија плаќала владата на СДСМ и ДУИ во периодот кога се задолжувала преку емисија на државни обврзници на меѓународниот пазар, рече дека тоа било 12 до 20 пати повеќе од тоа што сега ќе се плаќа како адвокатски услуги.
Предлог-законот за задолжување на Република Северна Македонија од 500 милиони евра кај Унгарската експорт-импорт банка, кој вчера од ВМРО-ДПМНЕ побараа да биде ставен на дневен ред на 14. седница беше прифатен од 62 пратеници.
Во образложението од ВМРО-ДПМНЕ зошто овој предлог-закон треба да се стави на дневен ред стои дека половина од парите од задолжувањето кај Унгарската експорт-импорт банка ќе завршат директно кај стопанството, а другата половина кај општините кои со нив треба да спроведат капитални и инфраструктурни проекти.
Во образложението на предлог-законот за задолжување на Република Северна Македонија од 500 милиони евра кај Унгарската експорт-импорт банка, кој се носи по скратена постапка, меѓу другото, се наведува дека Република Северна Македонија ќе ѝ плати провизија за извршени правни услуги на независна фирма избрана од страна на Унгарската експорт-импорт банка, приватно друштво со ограничена одговорност.