На прашањето како ја гледа актуелната коалиција СДСМ-ДУИ, Мицкоски одговори дека 15 пратеници на ДУИ владеат со 40 на СДСМ и тоа е, според него, лошо за државата
Правилото победник со победник заврши оној момент откако Али Ахмети одлучи да направи влада со Зоран Заев. Тоа правило е веќе категорија која е во историјата на македонската политика и никој нема ниту морално, ниту суштинско право да го поставува тоа барање, вели претседателот на ВМРО-ДПМНЕ, Христијан Мицкоски во гостувањето во „Клик плус“ на ТВ21.
Тој беше дециден дека ДУИ треба да оди во опозиција, додавајќи дека тие се предолго на власт и со преголем комфор. За Алтернатива рече дека ќе заврши без успех.
Според него, откако лидерот на Алтернатива, Африм Гаши „сменил дрес“ и одлучил да оди во друга екипа нивните политички гледишта за многу прашања им се различни.
„Ако ме прашувате дали оставија впечаток, простете но досега не видов такво нешто“,
оцени Мицкоски.
Тој додава дека знаел оти ќе дојде ден кога ќе се „обезличи таа политичка структура“
„Жалам што политичката филозофија на таа политичка опција која, во самото име да биде Алтернатива на ДУИ, ќе заврши како проект кој што е неуспешен“,
рече Мицкоски.
Според Мицкоски, формирањето влада треба да се води според програма и врз основа на тоа да се бираат политичките партнери.
„Не е прашање на чест, туку прашањето на Устав за формирање на влада. За жал во политиката Уставот е тој е кој е пред и над се“,
рече Мицкоски.
На прашањето како ја гледа актуелната коалиција СДСМ-ДУИ, Мицкоски одговори дека 15 пратеници на ДУИ владеат со 40 на СДСМ и тоа е, според него, лошо за државата.
„Пратениците и министрите на СДСМ се заробеници на ДУИ. Сега ова можеби ќе го зголеми рејтингот на ДУИ, но тоа е фактичката состојба. Овие 15 пратеника, владеат со оние 40. Таму се Бујар, Крешник и Артан. Од другата страна го имате Ковачевски. Дали некој знае кој е вицепремиер за борба против корупција. Јас не знам како изгледа. Јас ако не го видев министерот за правда на натпреварот во Палермо, немаше да знам дека е тука. Секоја чест како успеаја овие со 15 пратеника да ги надвладеат овие 40. Но, лошо е тоа за државата, се чувствуваат прекомотни“,
рече Мицкоски.