Според Мицкоски, градоначалничката Арсовска има ингеренции и ако навистина мисли дека е така, треба да постапува
Премиерот Христијан Мицкоски вели дека градоначалничката на Скопје има ингеренции за постапување коментирајќи ја вчерашната обиколка на Арсовска на неколку локации во Општина Чаир, на кои, како што рече, се градат дивоградби.
Според него, „ако навистина мисли дека е така, тогаш треба да постапува затоа што од филозофирање и гола реторика народот нема фајде“.
Арсовска вчера, вклучувајќи се со видео во живо на својот фејсбук-профил, покажа две градилишта и рече дека на терен со неа се инспекциските служби од градската управа.
Движејќи се по градилиштето, Арсовска рече дека во Општина Чаир се гради спротивно на законот и побара Министерството за внатрешни работи (МВР) да реагира.
Обвини дека од МВР, односно од надлежната полициска станица одбиваат да дојдат на терен и да извршат увид за безбедноста на градилиштето.
Таа го повика и градоначалникот на Чаир, Висар Ганиу, да дојде и да објасни како дозволува секаде низ неговата општина да се гради на диво.