Лидерот на ВМРО-ДПМНЕ смета дека Софија нема да даде зелено светло за влез во ЕУ се додека Резолуцијата на бугарскиот парламент не стане дел од документот што би го потпишале ние
Се додека целосно или делови од Резолуцијата на Бугарскиот парламент усвоена во ноември 2019 година и потврдена од бугарската Влада не влезе директно во документот што евентуално ние би го потпишале, или да биде дел од преговарачката рамка во предпристапните преговори, ние нема да добиеме рамка, односно нема да добиеме зелено светло за започнување на преговорите, вели лидерот на ВМРО-ДПМНЕ Христијан Мицкоски.
Во интервју за Македонското Радио, Мицкоски, за ова се повикува на свои информации, но не кажува кои. Како потврда на овој негов став тој ја посочува изјавата на новиот бугарски премиер Кирил Петков за „Политико“, каде вели дека нема да ги напуштат позициите кои што се поврзани со разликите за историските прашања.
„Овој харвардовец кој што беше најавуван како либерален политичар, кој што беше најавуван како политичар од страна на нашите политичари тука – претседателот Пендаровски, Зоран Заев и останатите, дека имал би рекол полиберални позиции во однос на прашањето со Македонија, гледаме дека не само што се конзервативни, и не само што се регресивни, туку тој го потврдува оној концепт познат како живковизам на негирање на македонската нација, македонскиот јазик, па дури и во одредена мерка на македонската држава“,
рече Мицкоски.
Врз основа на ова, Мицкоски заклучува дека станува збор за политичар кој не е храбар, бидејќи како што вели, „неговата политичка кариера е пред интересот да има добрососедски односи со неговиот западен сосед кој што многу одамна требаше да ги започне преговорите со Европската Унија“.
„Тоа е нечесно, лицемерно и во најмала рака можам да констатирам дека станува збор за човек кој не е храбар, кој што неговиот кариеризам е пред европските вредности, и тоа за мене е разочарувачки“,
вели Мицкоски.