На конференција во Скопје посветена на демографската отпорност, премиерот порача дека сите треба да си го поставиме прашањето што може секој од нас на направи за татковината, а не таа за нас бидејќи, како што рече, ако постојано го трошиме и злоупотребуваме системот, не може да бараме тој да ни враќа со најдобри политики и услуги
Младите кои мислат дека неколку месеци во некоја туристичка дестинација се доволни за да сонуваат за својата иднина – грешат. Треба да сонуваме и да ја градиме нашата заедничка иднина дома, во нашата татковина. Колку посилно сонуваме и колку посилно работиме дома, толку посилен систем ќе имаме. Не придонесувајте некаде надвор, во туѓи економии – иднината на вашата татковина се гради дома.
Ова беше пораката што премиерот Христијан Мицкоски денеска ја испрати до младите од своето обраќање на Регионалната министерска конференција „Предводење на промените: патеки кон демографска отпорност во согласност со потребите на луѓето“ во Скопје, што се одржува во организација на Министерството за социјална политика, демографија и млади и УНФПА, под покровителство на Владата.
Во своето обраќање, Мицкоски рече дека најголемиот предизвик во земјава, но и во Европа воопшто, не е само демографската промена, туку и неспособноста на системите навреме да ги препознаат промените и да се адаптираат со мудри и долгорочни политики. Во однос на состојбата во државата, премиерот рече дека постои свесност за демографската реалност која подразбира низок наталитет, иселување и одлив на млади и образовани луѓе. Ова, вели тој, се прашања што не може да се решат преку ноќ.
„Но, исто така сме свесни дека државата не смее да стои настрана и пасивно да ги набљудува процесите. Нашата определба е јасна – наместо политика на страв, градиме политика на отпорност. Наместо краткорочни мерки, создаваме долгорочна стратегија. Токму затоа ја подготвивме новата Стратегија за демографска отпорност 2026–2046 што ќе остане како национална рамка за иднината на државата. Оваа стратегија е изградена врз едноставна, но суштинска идеја – дека најголемата сила на една држава не се ресурсите, не се бројките, туку луѓето“,
порача Мицкоски.
За подобрување на состојбите во државата, премиерот смета дека најпрво е потребна инвестиција во човечкиот капитал – квалитетно образование, современи вештини и достапно здравство, зајакнување на семејствата и младите, создавање вистински инклузивни општества и трансформација на миграцијата од загуба во можност, односно создавање услови дијаспората повторно да ја види земјава како место за живот, инвестиции и иднина.
Кон крајот на своето обраќање, премиерот порача дека сите ние треба да си го поставиме прашањето што може секој од нас на направи за татковината, а не таа за нас бидејќи, како што рече, ако постојано го трошиме и злоупотребуваме системот, не може да бараме тој да ни враќа со најдобри политики и услуги.
„Мораме да сме свесни дека системот сме ние, и каков систем ќе изградиме, така тој систем ќе ни врати. Не можеме да бараме времена работа некаде во некои туристички земји, да придонесуваме во нивната економија неколку месеци во годината и да плаќаме таму даноци, а да бараме од нашиот здравствен систем тука бесплатно здравствено осигурување и да живееме со критика кон истиот систем што го измачуваме и го истрошуваме“,
изјави Мицкоски во обраќањето на конференцијата.
Премиерот изрази уверување дека денешната конференција ќе донесе конкретни идеи, нови партнерства и силна политичка определба за ставање на човекот во центарот на секоја демографска политика.