Лидерот на ВМРО-ДПМНЕ и денеска повтори дека пратениците од неговата партија нема да гласаат за уставни измени затоа што не ветиле такво нешто на изборите туку ветиле проекти, поквалитетни здравство, инфраструктура итн.
Лидерот на ВМРО-ДПМНЕ, Христијан Мицкоски, денеска понуди предвремени парламентарни избори во мај за кои, вели, претходно не мора да има техничка влада 100 дена.
Оваа понуда е контрапредлог на првиот вицепремиер Артан Груби, кој ѝ предложи на опозициската партија да ги изгласаат уставните измени и веднаш да одат на избори.
„Факт е дека Македонија има проблем, факт е дека тој проблем владата на ДУИ поддржана од СДСМ го донесе, а потврда на тој факт е дека условно кажано најпроевропската влада во Македонија има најмала поддршка за членство на Македонија во ЕУ. Затоа јас има контра предлог до нив, да не ја мачат македонската јавност, да престанат да крадат, да се охрабрат и ако мислат дека добро правеле изминативе години и изминативе месеци, еве во мај, не мора 100 дена техничка влада, еве и тоа им го овозможуваме – да одиме на избори и секоја политичка партија да понуди решение за проблемот во кој што ја втурнаа Македонија. Во спротивно само ја продолжуваат агонијата, Македонија ќе тоне и да тие ќе бидат побогати, но за жал еден ден тоа богатство од глава ќе им се удри“,
изјави денеска Мицкоски од Велес.
Груби, пак, понудата ја даде во четвртокот во гостувањето во емисијата „Само интервју“ на Канал 5 ТВ.
„Бујрум, нека влезат, нека гласаат за уставни измени и одиме на избори. Еве ова нека биде компромис на средина. Нека се охрабрат, нека направат таква одлука и да видиме. Нека излезат на избори да видиме дали ќе победат, дали ќе владеат“,
рече Груби.
Уставните измени треба да овозможат вметнување на Бугарите и други народи во Преамбулата од Уставот, што пак, е услов за понатамошно продолжување на преговорите со ЕУ.
Мицкоски, пак, денеска рече дека неговата партија има принципиелен став и повтори дека ВМРО-ДПМНЕ не учествувала во преговорите за францускиот предлог и оти неговите пратеници нема да гласаат за такво нешто.
„Ги предупредивме, не преземајте обврска којашто нема да ја исполните, но тие и покрај тоа ја втурнаа Македонија во една голема неизвесност и авантура прифаќајќи ја преговарачката рамка каде што билатералниот договор со соседна Бугарија е дел и тоа е единствен таков случај во историјата на ЕУ, мислејќи дека ќе се повторат некои минати искуства и дека на тој начин ќе добијат некои политички поени. Ги предупредивме дека нема да се повтори. Осум месеци потоа не убедуваа на отворена сцена, имале – немале, а гледаме дека немаат доволен број пратеници и нема да имаат, затоа што овие пратеници од пратеничката група на ВМРО-ДПМНЕ и коалицијата не излегоа на избори да ветуваат дека ќе преговараат дали Гоце Делчев бил Македонец или Бугарин, не ветуваа на избори дали Илинденското востание е македонско Илинденско или бугарско Преображенско. Овие луѓе ветуваа проекти, ветуваа поквалитетно образование, поквалитетно здравство, поквалитетна инфраструктура итн. Ние сакаме да покажеме дека не сме исти, дека стоиме до дадениот збор и тоа беше нашиот даден збор и оттука нема ни милиметар да се поместиме“,
рече Мицкоски.