„Хрватска е наш голем пријател и силен поддржувач на патот кон ЕУ“, објави Мицкоски на Фејсбук по средбата со својот хрватски колега, Андреј Пленковиќ, на маргините на Самитот за Западен Балкан – Берлински процес во Лондон
Соработката и поддршката во рамките на Договорот за соработка меѓу С Македонија и Велика Британија биле во фокусот на средбата меѓу вицепремиерот и министер за транспорт Александар Николоски и министерката за финансии Гордана Димитриеска-Кочоска со извршниот директор на Националната агенција за надворешно финансирање на Обединетото Кралство – УКЕФ, Тим Рид
Економската состојба на државата, продлабочување на соработката и развојот на нашата земја. Ова биле темите на кои премиерот Христијан Мицкоски денеска разговарал со директорката на Европската банка за обнова и развој (ЕБОР), Одил Рено-Басо, на маргините на Самитот за Западен Балкан – Берлински процес што се одржува во Лондон, Велика Британија.
Информирајќи за средбата преку објавата на социјалните мрежи, Мицкоски вели дека на средбата истакнал дека зајакнувањето на економските и трговските односи останува еден од приоритетите на Владата што ја предводи.
„Остануваме посветени за развој и раст на Македонија и сите граѓани“,
напиша Мицкоски на Фејсбук.
Во друга објава, премиерот информира и за остварена средба со својот хрватски колега Андреј Пленковиќ на која, како што наведува, двајцата дискутирале за европската перспектива на земјава и напредокот во реформските процеси.
„Хрватска е наш голем пријател и силен поддржувач на патот кон ЕУ“,
вели Мицкоски во објавата.
Претходно денеска, тој информира дека потпишал меморандум за разбирање со американско-британската компанија „Бурсток“, која ќе инвестира во наменската воена индустрија во Македонија.
Очекувањата, додаде Мицкоски, се овие инвестиции да достигнат повеќе од една милијарда американски долари.
„Ќе имаме нови високоплатени 1 000 работни места и ова е само почеток“,
објави премиерот на Фејсбук.
Од Министерството за транспорт попладнево преку писмено соопштението информираа дека ресорниот министер и вицепремиер Александар Николоски и министерката за финансии Гордана Димитриеска-Кочоска, кои се дел од владината делегација на Самитот во Лондон, денеска имале средба со Тим Рид, извршниот директор на Националната агенција за надворешно финансирање на Обединетото Кралство -УКЕФ.
На средбата, како што се наведува, било разговарано за деталите за соработката и поддршката што ја овозможува оваа агенција во рамките на договорот за соработка меѓу двете земји.
„На Македонија ѝ се ставени 6 милијарди евра на располагање преку УКЕФ за реализација на капитални проекти кои треба да го поддржат севкупниот развој на државата и треба да донесат додадена вредност во делот на транспортот, здравството, образованието, енергетиката и животната средина“,
се наведува во соопштението.
На средбата, вицепремиерот Николоски, покрај финансискиот дел, како исклучителна ја оценил ја оценил поддршката на Велика Британија во пренесувањето експертски знаења, искуства и технологии во реализација на крупните проекти предвидени со партнерскиот договор влада со влада.
Во овој контекст, вицепремиерот и министер за транспорт ја истакнал огромната посветеност на Владата во реализација на инфраструктурните проекти кои се опфатени во првата фаза со договорот, ставајќи посебен фокус на изградбата на брз пруга и инвестициите во изградба на нови болници.