Покрај ова, опозицискиот лидер му порача на владејачкиот СДСМ да внимава каква комуникација гради со стратегиските партнери, зашто, како што рече, последните мерења на јавното мислење во Германија покажуваат дека ЦДУ ќе победи на следните избори
Во времето кога Христијанско-демократска унија/Христијанско-социјална унија (ЦДУ/ЦСУ) беше на власт во Германија се донесе поцврста резолуција за Македонија, вели лидерот на опозициската ВМРО-ДПМНЕ, Христијан Мицкоски, коментирајќи ја резолуцијата што минатата недела ја донесе германскиот Бундестаг, а со која се дава поддршка на македонскиот идентитет, јазик и култура на патот на земјава кон членство во Европската Унија.
Инаку, резолуцијата не доби поддршка од опозициските партии во германскиот парламент, вклучително и конзервативната ЦДУ/ЦСУ, која идеолошки е сестрински партија на ВМРО-ДПМНЕ.
„Ја следам пропагандата којашто доаѓа од СДСМ и сум изненаден, затоа што со денови ја прозиваат ВМРО-ДПМНЕ зашто ЦДУ не гласала за резолуцијата. Кога мислите дека го допреле дното, тие ви кажуваат дека сте песимист, требало да сте оптимист, бидејќи можеле подлабоко да одат“,
изјави Мицкоски одговарајќи на новинарски прашања за време на посетата на Аеродром.
Додаде оти оваа резолуција е степен подолу, а дека кога сестринската партија ЦДУ на поранешната канцеларка Ангела Меркел беше на власт во Германија имало многу посилна резолуција и многу подобар предлог.
„На предлог на ЦДУ во минатото имаше многу поцврста резолуција која посилно ги брани македонските идентитетски одредници. Сакам да ве потсетам и дека кога Германија претседаваше со ЕУ, во времето кога канцелар беше Ангела Меркел и кога ЦДУ беше владејачка партија, стигна предлог во кој ниту билатералниот договор беше во преговарачката рамка ниту, пак, се отвораше прашањето за македонскиот јазик, а што се однесува до историјата и останатите идентитетски одредници не се ни споменуваа“,
додаде опозицискиот лидер.
Покрај ова, Мицкоски му порача на владејачкиот СДСМ да внимава каква комуникација гради со стратегиските партнери, зашто, како што рече, последните мерења на јавното мислење во Германија покажуваат дека ЦДУ ќе победи на следните избори.
„Би бил најсреќен да го имаме повторно на маса предлогот на германското претседателство или условно кажано германскиот предлог“,
кажа лидерот на ВМРО-ДПМНЕ.
Германскиот парламент – Бундестагот, со мнозинство гласови на пратениците од трите владејачки партии – Социјалдемократите, Либералите и Зелените на 15 јуни ја изгласа резолуцијата со која се дава поддршка на македонскиот идентитет, јазик и култура на патот на земјава кон членство во Европската Унија.
Резолуцијата не доби поддршка од опозициските партии, вклучително и од конзервативната Христијанско-демократска унија/Христијанско-социјална унија (ЦДУ/ЦСУ) на поранешната канцеларка Ангела Меркел.
ЦДУ и баварската ЦСУ идеолошки се сестрински партија на ВМРО-ДПМНЕ.