„Со изгубен образ и достоинство ниту на нив нема да им вршиме работа, а оваа Влада нема повеќе намера да губи од достоинството и образот“ изјави денеска Мицкоски, прашан што очекува од утрешната средба со претседателката на Европската комисија
Премиерот Христијан Мицкоски очекува при утрешната посета на претседателката на Европската комисија (ЕК), Урсула фон дер Лајен, на земјава да бидат реафирмирани позициите дека наша стратешка цел останува членството во Европската Унија (ЕУ), додавајќи оти се надева дека во таа насока ќе има испорака и од страна на ЕУ, за малку да го зачуваме образот, кој, според него, како да сме го изгубиле чекорејќи по тој пат.
Мицкоски, кој денеска заедно со министерот за здравство Азир Алиу беше во посета на Клиниката за трауматологија, ортопедија, анестезија, реанимација и интензивно лекување и Ургентен центар (ТОАРИЛУЦ), меѓу другото, беше прашан од новинарите какви пораки очекува од шефицата на извршното тело на Европската Унијата, Фон дер Лајен.
„Па очекувам да ги реафирмираме позициите дека нашата стратешка цел останува полноправно членство во рамките на Европската Унија. Некако изминативе 25 години како полека да го изгубивме образот чекорејќи по тој пат и како малку да остана од тоа достоинство и од тој образ. Се надевам дека ќе има испорака и од страна на Европската Унија за да малку го зачуваме образот пред да влеземе, затоа што со изгубен образ и достоинство ниту на нив нема да им вршиме работа, а оваа Влада нема повеќе намера да губи од достоинството и образот“,
рече премиерот.
Претседателката на Европската комисија (ЕК) утре (15 октомври) доаѓа во Скопје во рамките на нејзината турнеја низ земјите од Западниот Балкан.
За време на престојот во Скопје, Фон дер Лајен ќе има одвоени средби со претседателката Гордана Сиљановска-Давкова, со премиерот Христијан Мицкоски и со претседателот на Собранието, Африм Гаши.
Во најавата за турнејата низ земјите од Западен Балкан, која Фон дер Лајен ја стартуваше вчера со посетата на Албанија и Црна Гора, од Европската комисија комисија дека таа ќе биде можност за реафирмација на поддршката на ЕУ за членство на земјите од регионот во Унијата, нивниот постепен пристап до Единствениот европски пазар, а тема на разговор ќе биде и спроведувањето на Планот за раст.
Премиерот Мицкоски вчера во изјава за медиумите рече дека на средбата со Фон дер Лајен ќе го отвори прашањето околу новиот електронски систем за влез и за излез од земјите на Европската Унија, кој стапи во сила завчера и важи за сите што доаѓаат надвор од земјите надвор од Шенген-зоната, меѓу кои и Македонија.
„Она што јас ќе го покренам како прашање и на дискусијата сега со претседателката на Европската комисија, Урсула фон дер Лајен, но и на Берлинскиот процес ќе биде токму тоа – кога ќе слетате на кој било европски аеродром во земја членка на ЕУ има натпис ‘граѓани на ЕУ’ и ‘граѓани што не се од ЕУ’, а се дел од Европа и други граѓани. Ако навистина сакаме до 2030 година да го видиме регионот како дел од Европа, мислам дека најмалку што треба да направи ЕУ е да не нè дискриминира, сите да бидеме граѓани на Европа“,
рече премиерот по вчерашната средба со претставниците на Стопанската комора на северо-западна Македонија.