„Пријатели си помагаат, но и пријатели искрено си ги кажуваат своите чувства и забелешки… Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Ние ќе останеме лојален партнер и заедно и посветено ќе работиме кон остварувањето на колективните цели“, рече премиерот во своето обраќање на состанокот на Парламентарното собрание на НАТО, што се одржува во Скопје
Трагедијата во Кочани ни покажа дека солидарноста не е само збор, туку дело што ги поврзува народите. Таа е темелот на нашата Алијанса – принцип што нè води во заедничките напори за зачувување на мирот и безбедноста. Солидарноста значи дека кога еден од нас страда, сите страдаме. Кога еден е во неволја, сите притрчуваме на помош, кажа премиерот Христијан Мицкоски во своето обраќање на отворањето на редовниот годишен состанок на Постојниот комитет на Парламентарното собрание на НАТО, што денеска се одржува во Собранието на Република Северна Македонија.
Премиерот своето обраќање го започна осврнувајќи се токму на трагедијата во Кочани во која животите ги загубија 60 лица, а речиси 200 се повредени.
„На огромна жал, вчера животот го загуби и Александар Карадаковски. Лекарите се бореа до последниот момент да го спасат неговиот живот. Битката продолжува. Оваа несреќа не само што ни покажа колку е кревок животот, туку и ја истакна важноста на солидарноста и меѓусебната поддршка. Во тие тешки моменти, сведочевме на вистинска солидарност од нашите сојузници и партнери. Девет европски држави понудија помош на нашата земја веднаш по трагедијата во Кочани. Европската Унија, пак, преку механизмот за цивилна заштита, координираше медицински евакуации на повредените до специјализираните болници во регионот“,
рече премиерот.
Говорејќи во таа насока, но во друг контекст, тој посочи дека нашата татковина во многу наврати ја докажа својата солидарност со останатите држави во светот, но, од друга страна, не секогаш го добивала она што го очекувала.
„И во својот трнлив пат до целта направи многу отстапки, многу одрекувања, и многу од нив наидоа на дебата кај граѓаните, некои внесоа оправдано сомневање, но истрајавме и ја покажавме својата лојалност кон вредностите кон кои и понатаму веруваме. Од друга страна, не секогаш нашата татковина го добивала она што го очекувала, и таквата лојалност спрема нашите заложби се исполнувала. Тоа е чувството кое го има секој еден кон нас и секој еден граѓанин. Мислам дека е важно да се знае ова, ниту, пак, треба да се сокрие ова горко чувство кај секој еден Македонец“,
кажа Мицкоски.
Во таа насока, тој рече дека треба да се размисли за воведување механизми кои нема да дозволуваат билатералните спорови да бидат пречка за остварување на заедничките цели.
„Пријатели си помагаат, но и пријатели искрено си ги кажуваат своите чувства и забелешки. Сметам дека треба да се размисли и за воведување на механизми каде нема да се дозволи билатерални спорови да бидат пречка за остварување на колективната и заедничка цел. Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Ние ќе останеме лојален партнер, и заедно и посветено ќе работиме кон остварувањето на колективните цели“,
рече премиерот.
Предизвиците се менуваат, но „нашата заедничка решителност мора да остане црвста“, кажа тој и повторно навраќајќи се на трагедијата во Кочани, посочи дека таа треба да ни биде потсетник дека човечноста, солидарноста и заедништвото се најсилното оружје што го имаме.
Премиерот во обраќањето се осврна и на чекорите што земјава ги прави како членка на НАТО во подобрувањето на одбранбените перформанси кои треба да одговорат на заеднички цели на Алијансата. Во тој контекст, Мицкоски рече дека во изминатите пет години значително ја подобривме интероперабилноста на нашите вооружени сили со оние на другите сојузници, дека работиме на подобрување на стратешкото планирање, цивилната контрола врз армијата, модернизацијата на опремата и транспарентноста во управувањето со одбранбените ресурси.
„Обуките се одвиваат според НАТО-доктрини, а новите институционални механизми нè прават поотпорни на хибридни закани. Сето тоа е одраз на нашата политичка волја и консензусот дека безбедноста и интегритетот на државата се врвен приоритет. Иако сме горди на постигнатото, свесни сме дека патот не завршува тука. Хибридни и сајбер-закани, дезинформации, климатски кризи – сите тие бараат постојана адаптација и координација“,
рече премиерот.
Тој наведе дека регионалната соработка е клучна за стабилноста на Балканот и дека тоа за нас претставува одговорност и можност да биде мост меѓу народите, меѓу институциите и меѓу визии.
„Веруваме дека Балканот може и треба да биде пример за решавање на разлики преку дијалог и заемна почит“,
рече премиерот.
Министерот за одбрана Мисајловски во своето обраќање рече дека состанокот на Постојаниот комитет, кој по првпат се организира во Македонија, е силен сигнал на единство и потврда за нашите досегашни одлуки за зајакнување на сојузничката соработка, транспарентноста и парламентарната демократија.
„Пратениците се витален линк помеѓу претставниците на сите 32 парламенти и сме им благодарни за сета работа и посветеност во одбраната на заедничките цели и интереси. Остануваме посветени на стабилното инвестирање во одбраната, со издвојување на 2 проценти од бруто-домашниот производ и над 32 проценти од нив за една од најважните ставки – опремувањето и модернизацијата на Армијата, со што ја зацврстуваме националната и колективната одбрана“,
рече Мисајловски.
Министерот рече дека НАТО е идеал што се темели на тоа дека само ако сме заедно и здружени, можеме да го одбраниме и зацврстиме нашиот начин на живот.
Парламентарното собрание на НАТО е мултилатерална организација која воспоставува суштинска врска меѓу НАТО и парламентите на земјите членки на НАТО, обезбедува поширока транспарентност на политиките на Алијансата и придонесува за јакнење на трансатлантските вредности на Организацијата.