За најавите дека ќе разговарале со пратеници, ќе им кажам и ќе им порачам – ова не е 2018 година, друго време е. Пратениците на ВМРО-ДПМНЕ се последниот браник кој нема да попушти под какви и притисоци тие да прават, зошто и тие знаат, и народот знае дека им се избројани деновите, рече Мицкоски
Говорејќи за уставните измени, Мицкоски рече дека тие нема да се случат под бугарски диктат ниту сега ниту кога било во иднина и ВМРО-ДПМНЕ нема да оди против својот народ
Пред прагот сме на промената која треба да ги оствари надежите поради кои ја водиме оваа битка, на промената која сакате сите вие да ја видите и ја чекате шест години. Пред прагот сме да почнеме да ја создаваме иднината поради која вреди секоја наша борба и жртва, истакна претседателот на ВМРО-ДПМНЕ, Христијан Мицкоски, на вечерашната трибина на тема „33 години ВМРО-ДПМНЕ и Македонија“.
Тој порача дека е потребна, како што рече, промена во погледите, промена во тактиката како држава, промена во мисиите од страна на владата, на народот, од страна на секој лидер и поединец.
Според него, работите никогаш не биле толку драматични како во последните шест години кога „немаме само лошо владеење, не само управување кое е навреда на интелигенцијата на народот, туку масовен удар по нашето постоење, рекомпонирање на погрешни и новосоздадени основи кои никогаш не биле дел од нашиот код, нашиот идентитет“.
„Од власта нè уверуваат дека било европски да ги менуваме нашите традиции и нашите верувања. А знаете дека е многу мала вредноста на зачувување на нашата нација, ако нашите традиции не ги сочуваме со неа, ако не го заштитиме нашиот јазик, култура и она што сме и по што се разликуваме“,
рече Мицкоски.
Според него, потребна е промена во погледите, промена во тактиката како држава, промена во мисиите од страна на владата, на народот, од страна на секој лидер и поединец.
„Денес се соочуваме со акција за бесчувствително декомпонирање на македонскиот национален идентитет, кој се потпира врз мотивот за ширење на своите лукративни сфери на личното влијание на власта за сметка на колективниот интерес, на инфилтрација на лични интереси, наместо инвазија на знаење, на субверзија и одлоговлекување, наместо на избори на заплашување, наместо на слободен избор, на поклонување и наведнување на глава, наместо на кажување на аргументи, на простодушност наместо разум“,
рече Мицкоски.
Говорејќи за уставните измени, Мицкоски рече дека тие нема да се случат под бугарски диктат.
„Уставни измени под бугарски диктат нема да има ниту сега ниту кога било во иднина и ВМРО-ДПМНЕ нема да оди против својот народ“,
додаде Мицкоски.
Како што рече, ако се вразуми власта, во што кажа дека не верува, тука е за да разговара единствено за она што ќе значи исполнување на еден од двата предлози кои ги дал.
„Тоа се нашите црвени линии од кои нема повлекување. А, за најавите дека ќе разговарале со пратеници, ќе им кажам и ќе им порачам – ова не е 2018 година, друго време е. Пратениците на ВМРО-ДПМНЕ се последниот браник кој нема да попушти под какви и притисоци тие да прават, зошто и тие знаат, и народот знае дека им се избројани деновите. А, изборите стануваат единственото решение за излез од кризата“,
рече претседателот на ВМРО-ДПМНЕ.
Мицкоски посочи дека наредните избори нема да бидат само порака од народот за тоа што тој мисли за уставните измени, туку многу повеќе од тоа, порака, како што рече, од народот за оваа власт што тој мисли за реалниот живот кој е тежок, сиромашен и многу несигурен.
На трибината што се одржа на Летната сцена на Опера и балет говореа и Ламбе Арнаудов, поранешен пратеник во македонскиот парламент, Ѓорѓија Сајкоски, генерален секретар на ВМРО-ДПМНЕ, потпретседателите на партијата Александар Николоски и Владо Мисајловски, Дафина Стојаноска, член на ИК на ВМРО-ДПМНЕ, и Борис Шамбевски, претседател на ГК на УМС на ВМРО-ДПМНЕ.
Потпретседател на ВМРО-ДПМНЕ, Владо Мисајловски, рече дека сѐ додека постојат луѓе кои сакаат да ја видат Македонија напред и да прават добро за државата, тоа е најдоброто нешто за неа.
Потпретседателот Александар Николоски истакна дека и покрај сите опструкции кои се случија во изминативе неколку години, ВМРО-ДПМНЕ успеа да помине низ внатрешна катарза и да определи нови правци кои ќе дадат одговор на корупцијата и сите негативни појави кои во моментов се случуваат во Македонија.
Ѓорѓија Сајкоски, генерален секретар на ВМРО-ДПМНЕ им порача на сите, како што рече, „добронамерници“ да се приклучат на ВМРО-ДПМНЕ.
„Следниот период е специфичен да го поддржат визионерството на ова раководство и Македонија како држава онака како што заслужуваме сите. Ние како раководство ги оставаме вратите отворени за секој член и поединец кој размислува како нас да влезе со нас и заеднички да ја градиме државата“,
рече тој.
Во воведниот дел на трибината се обратија градоначалниците на неколку скопски општини: Бобан Стефковски, Орце Ѓорѓиевски, Дарко Костовски, Тимчо Муцунски и Ленче Нелоска, претседателка на Советот на Ѓорче Петров, кои зборуваа за реализираните проекти во нивните општини.