„Во првите 100 дена очекуваме исклучително добри вести за сите граѓани, во смисла на подобрување на стандардот, една финансиска бомба би рекол. Ние нема да се занимаваме со политички бомби, со ниски страсти, со напади, ние планираме да работиме за подобрување на стандардот на граѓаните, тоа е нашата цел и планираме да го заслужиме нашето место во историјата“, рече Мицкоски
По прегласувањето во петтата изборна единица, лидерот на ВМРО-ДПМНЕ Христијан Мицкоски очекува мнозинство во парламентот од 62 пратеници. Тоа, според него, би било историска можност.
„Фокусирајќи се на народот, имаме навистина би рекол една историска можност како никогаш досега, во овие повеќе од три децении. Се уште имаме малку да ја завршиме задачата, на 22 мај ќе има прегласување во изборната единица пет, очекуваме уште еден пратеник таму и веќе на следното мое обраќање со вас, со народот на Македонија, да не кажувам за 61, туку да зборувам веќе за 62 пратеника“,
рече денеска Мицкоски во своето обраќање во делчевското село Разловци, каде што присуствуваше на одбележување на годишнината од Разловечкото востание.
Следната цел, како што рече тој, е двотретинско мнозинство во парламентот.
„Мислам дека и тоа многу скоро, денеска веќе, кон крајот на следната недела ќе можеме и тоа да го оствариме, со што ќе биде променет законот за организација на ресорите во самата влада ќе добиеме нова структура на влада, модерна влада, влада којашто ќе одговара на потребите на граѓаните во Македонија“,
рече лидерот на ВМРО-ДПМНЕ.
Мицкоски најави „историски реформскиот процес кој не е виден досега во Македонија“.
„Во првите 100 дена очекуваме исклучително добри вести за сите граѓани, во смисла на подобрување на стандардот, една финансиска бомба би рекол. Ние нема да се занимаваме со политички бомби, со ниски страсти, со напади, ние планираме да работиме за подобрување на стандардот на граѓаните, тоа е нашата цел и планираме да го заслужиме нашето место во историјата“,
додаде Мицкоски.
Управниот суд ги отфрли како неосновани сите седум тужби од „Европскиот фронт“, поднесени против решенијата на Државната изборна комисија поврзани со изборите одржани на 8 мај. Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица. Прегласувањето на тие избирачки места треба да се случи на 22 мај, а според приговорите, може да влијае на конечните резултати од гласањето.