Во пораката објавена на својот фејсбук-профил, премиерот вели дека пораката на папата Франциск за мир, солидарност, грижа за најранливите и дијалог меѓу народите била светлина за милиони луѓе, без разлика на верата или нацијата
Премиерот Христијан Мицкоски денеска во свое и во име на Владата изрази сочувство до Ватикан и до Католичката црква за смртта на папата Франциск, кој се упокои денеска на 88-годишна возраст.
„Со длабока тага ја примив веста за смртта на Неговата Светост, папата Франциско – духовен водач кој зад себе остава неизмерно хуман, чесен и посветен траг во историјата на современиот свет. Беше глас на совеста во време на глобални предизвици и неизмерен пример за човечност и морална храброст“,
порача премиерот.
Во пораката објавена на својот фејсбук-профил, Мицкоски вели дека пораката на папата Франциск за мир, солидарност, грижа за најранливите и дијалог меѓу народите била светлина за милиони луѓе, без разлика на верата или нацијата. Додава дека папата низ годините во континуитет ја изразувал својата поддршка за Македонија – за нејзините напори за мир, соживот и почитување на различностите.
„Неговите зборови секогаш охрабруваа, а неговиот однос кон нашиот народ беше исполнет со топлина и почит. Вечна му слава и благодарност“,
додава Мицкоски во објавата на Фејсбук.
Папата Франциск, првиот поглавар на Римокатоличката црква од Латинска Америка, почина утрово на 88-годишна возраст. Тој беше 266. поглавар на Римокатоличката црква.