„За жал, морам да кажам дека повторно од Исток стигаат поинакви коментари и гласови, но да видиме како ќе заврши целата работа со резолуцијата, со која, ќе повторам, се признава посебниот, многувековен македонски идентитет и посебниот, меѓународно кодифициран македонски јазик“, рече премиерот на денешната прес-конференција
Премиерот Христијан Мицкоски очекува европратениците едногласно да го усвојат извештајот во кој се потврдуваат македонскиот идентитет и јазик. За извештајот, кој по првпат ќе се најде во Европскиот парламент, според информациите кои премиерот ги сподели на денешната прес-конференција, европратениците ќе расправаат на 4 јуни, а гласањето се очекува да биде во јули годинава.
„За првпат пред европратениците ќе се најде извештај во кој на неколку наврати се споменува многувековниот, посебен македонски идентитет и јазик. Бидејќи честопати е повторувано дека тоа не е проблем, честопати е повторувано дека тоа во суштина не е пречка за никого, очекувам европратениците едногласно да го усвојат овој извештај во којшто се потврдува посебниот многувековен македонски идентитет и посебниот македонски јазик којшто е дел од официјалните јазици на Обединетите нации и меѓународно признаен или кодифициран 1977 година, иако неговата кодификација е завршена уште во 1945 година во рамките на Обединетите нации“,
рече Мицкоски на денешната прес-конференција во Владата.
Во оваа смисла, премиерот ги повика сите политички партии во државата уште од денеска да почнат да лобираат кај своите сестрински партии кои се дел од Европскиот парламент со цел усвојување на резолуцијата.
„Знам дека опозицискиот СДСМ е дел од едно такво семејство. Истото јас како што знам е и политичката опозициска партија ЛДП. Ги повикувам уште денеска да почнат да вртат до своите сестрински партии. Ние денеска како политичка партија ќе имаме извршен комитет на кој ќе подготвиме стратегија како ВМРО-ДПМНЕ на лице место ќе испрати луѓе коишто претстојните денови ќе бидат во Брисел за да продолжат да разговараат со европратениците и потребата од носењето на оваа резолуција“,
додаде Мицкоски.
Ваквата резолуција, како што рече премиерот, не доаѓа туку-така, туку е плод на работа во изминатата година.
„За жал, морам да кажам дека повторно од Исток стигаат поинакви коментари и гласови, но да видиме како ќе заврши целата работа со резолуцијата, со која, ќе повторам, се признава посебниот, многувековен македонски идентитет и посебниот, меѓународно кодифициран македонски јазик“,
рече премиерот.
Расправата во Европскиот парламент за извештајот за признавање на македонскиот јазик и идентитет е закажана за 4 јуни, а гласањето би требало да биде во јули.