Премиерот и лидер на ВМРО-ДПМНЕ оцени дека од клучно значење е лидерите на Европската народна партија (ЕПП) и во институциите на ЕУ и во земјите членки да станат движечка сила зад проширувањето на регионот на Западен Балкан во ЕУ
Европскиот проект ветува еднаквост, правичност и можности – но, понекогаш, ние доживуваме поинаква реалност. Нашиот народ, гордите македонски граѓани кои ги претставувам, од прва рака ја почувствуваа тежината на двојните стандарди – порача премиерот и лидер на ВМРО-ДПМНЕ, Христијан Мицкоски, во обраќањето од Конгресот на Европската народна партија (ЕПП) во Валенсија, каде што говореше за македонските евроинтеграции.
И покрај спроведените жртви и реформи на патот кон Европската Унија, како што рече премиерот во говорот, македонската нација постојано се соочува со дополнителни услови кои, според него, се применуваат селективно и ги прикриваат транспарентноста и правичноста што ги ветува Европа.
„Овој пристап не ја зајакнува Европа – го слабее нашиот колективен кредибилитет и ги намалува нашите заеднички цели. Интеграцијата на Западен Балкан во ЕУ не е само чин на добротворност – тоа е стратешки императив. Тоа обезбедува мир, стабилност и безбедност не само за нашиот регион, туку и за цела Европа. Процесот на пристапување мора да остане заснован на заслуги, воден од јасни критериуми и транспарентни проценки. Ова не е услуга што се дава произволно, туку е праведно признание за напорите и реформите“,
порача Мицкоски во обраќањето на Конгресот на ЕПП.
Во оваа смисла, премиерот и лидер на ВМРО-ДПМНЕ оцени дека од клучно значење е лидерите на Европската народна партија и во институциите на ЕУ и во земјите членки да станат движечка сила зад проширувањето на регионот на Западен Балкан во ЕУ.
„Вашето лидерство и проактивен ангажман значително ќе го подобрат кредибилитетот и ефективноста на процесот на проширување. Цврсто верувам дека нашата колективна иднина лежи во обединето европско семејство. Наша заедничка одговорност е да го поддржуваме интегритетот на овој процес, потврдувајќи ја нашата посветеност на правичност и еднаквост. Македонскиот народ заслужува да види дека неговата посветеност и жртви вистински се почитуваат и се признаваат“,
додаде тој.
Мицкоски порача дека македонската влада останува на идејата за заедничка европска иднина, останувајќи посветена на конзервативните вредности.