Во говорот пред битолчани, премиерот и лидер на ВМРО-ДПМНЕ се осврна и на политиките на претходната власт, оценувајќи дека т.н. црвени линии предложени од опозицискиот СДСМ се „уште една спакувана лага“
Премиерот и лидер на ВМРО-ДПМНЕ, Христијан Мицкоски, го обвини претседателот на ДУИ, Али Ахмети, дека не го засегаат Албанците во државата и дека нема план како да ги задржи во родните места. Рече дека Ахмети ја користи предизборната кампања за да се заканува и да дели историски лекции наместо да зборува за иднината.
„Човекот води кампања за локални избори, а на секој митинг не ја испушта можноста да дели лекција од историја, нешто што се случило пред повеќе од 30 години. Претпоставувам таа е онаа матрица која е заробена во минатиот век. Но, додека беше во владата не заборави своето семејно портфолио да го зголеми со еден убав трговски центар во центарот на главниот град. Тоа не го заборави. Но, затоа не кажува ниеден збор за иднината, што планира да сработи, што да направи да ги задржи Албанците во своите родни краеви“,
порача премиерот во обраќањето од митингот во Битола.
Додаде дека единственото нешто што првиот интегративец го прави во оваа кампања е се заканува, присетувајќи се на случки од пред 30-ина години и играјќи исклучиво на етничка карта.
„Сакам да му порачам дека овие лекции се прочитани, научени, тие се минато и затворена книга. Ние читаме една нова книга, книга која значи развиена и богата Македонија. Македонија во која сите граѓани ќе се среќни а младите што се селеа поради таквите политичари како него да се вратат во државава“,
рече Мицкоски.
Во говорот пред битолчани, премиерот и лидер на ВМРО-ДПМНЕ се осврна и на политиките на претходната власт, оценувајќи дека т.н. црвени линии предложени од опозицискиот СДСМ се „уште една спакувана лага“.
„Такви лаги видовме во минатото многу. Кога најмногу се удираат во гради за некаков патриотизам, во тој момент најмногу ја продаваат и предаваат Македонија. Се сеќавате како велеа – ‘не ми ја чепкајте жицата од гитарата’, а отидоа и без око да им трепне направија историско предавство. Го потпишаа договорот со источниот сосед, а со тоа ја отворија Пандорината кутија што претставуваше мотив за неколку години потоа да го прифатат т.н. бугарски диктат за кој самиот Филипче говореше дека го чувал идентитетот. Ако со прифаќањето на бугарскиот доктат бил зачуван идентитот, зошто денеска се потребни црвени линии“,
изјави Мицкоски.
Повтори дека додека е премиер, за него единствено се прифатливи, како што рече, македонски линии.