Запрашан за очекувањата на коалицијата ВЛЕН ресорот здравство да остане кај нив, Мицкоски нагласи дека Владата треба да ја задржи досегашната структура
Премиерот Христијан Мицкоски очекува најдоцна до идната недела да бидат познати имињата на новите членови во Владата, кои ќе ги заменат функционерите од крилото на Алијанса за Албанците што изминатите денови поднесоа оставки.
Запрашан за очекувањата на коалицијата ВЛЕН ресорот здравство да остане кај нив, Мицкоски нагласи дека Владата треба да ја задржи досегашната структура.
„Мислам дека треба да се задржи онаа структура во Владата во којашто функционира до сега. Очекувам предлог па да видиме со какви квалификации располага предлогот“,
рече премиерот.
Испразнетите функции во Владата се резултат на одлуката на крилото на Алијанса за Албанците на Арбен Таравари да ја напушти коалицијата ВЛЕН и учеството во Владата и да дејствува како опозиција.
По ова Таравари си поднесе оставка од функцијата министер за здравство, а по него од функциите заменик-министер заминаа и Фљакрон Беџети и Елфет Исмаили од ресорите земјоделство, шумарство и водостопанство и за одбрана.
Во Собранието денеска беа констатирани оставките на доскорешните функционери од крилото на Алијанса за Албанците.
Денеска оставка си поднесе и националниот координатор за имплементација на нови технологии Блерант Рамадани.