Лидерот на ВМРО-ДПМНЕ Христијан Мицкоски во вечерашниот настап на ТВ 21 негираше дека му се извинил на лидерот на Алијанса за Албанците (АА) Зијадин Села за „27 април“.
Генералниот секретар на АА, Арбен Таравари, пак, претходно на истата телевизија имаше изјава дека на конференција на „Конрад Аденауер“ во хотелот Хилтон Мицкоски се извинил.
„Јас ја слушнав таа изјава од господинот Таравари. Таа рефлектира на она што го кажав на самиот почеток на таа конференција на ’Конрад Аденауер‘ каде кажав дека жалам за тоа што му се случи на господинот Села и посакав никогаш тоа да не се повтори. Тоа беа моите зборови“,
рече Мицкоски на ТВ21.
На дополнителни прашања дека иако жали, сепак, не се извинил, лидерот на ВМРО-ДПМНЕ рече дека не може да се извинува за нешто за што тој не бил причина да се случи.
„Човечка емпатија е да жалите ако на некого тоа му се случи, а за да се извините за нешто треба да сте вие причината дека тоа се случило. Јас не сум причината и не можам да се извинувам за нешто за што не сум причина да се случи, но истовремено како човек како сограѓанин, како пријател, сакам да изразам моја лична емпатија“,
рече Мицкоски.