Посочи дека тој лично, но и Владата не се задоволни од работата на Судскиот совет и на сегашниот државен јавен обвинител Љупчо Коцевски и додаде дека логично би било да се бара негова смена
Премиерот Христијан Мицкоски вечерва во гостување во ТВ Телма рече дека судиите во земјава бараат судски буџет далеку над европскиот просек, дури и 75 отсто повеќе. Затоа, не гледа причина за зголемување на таа сума бидејќи судиите не покажале резултати за да добијат таков буџет.
„Ќе презентирам една анализа за македонските граѓани. Ова е европски извештај. Буџетот што ние како држава го издвојуваме за правосудството е 0,39 отсто од нашиот бруто-домашен производ. Соседна Грција издвојува 0,26 отсто, Франција 0,2 отсто. Германија издвојува 0,3 отсто, а европскиот просек е 0,31 отсто од бруто-домашниот производ, а медијаната е 0,28 отсто. Ние издвојуваме повеќе и од медијаната и од европскиот просек или во бројки повеќе од 75 отсто од земјите членки на ЕУ“,
кажа тој.
Според него, дури и земјите што се стремат кон ЕУ издвојуваат помал буџет од Македонија, како Албанија, која издвојува 0,295 отсто, Молдавија 0,35 отсто, Грузија 0,23 отсто.
„Законот вели дека таа сума треба да е до 0,8 отсто. Во новите измени на законот бараат минимум 0,5 отсто за обвинителството или вкупно 1,3 отсто. Но, тоа теоретски не е возможно бидејќи би било трипати повеќе од земјата што издвојува најмногу за правосудството во Европа“,
вели премиерот.
Читајќи податоци од европскиот извештај, посочи дека судија почетник во земјава годишно заработува 19 170 евра бруто-плата, а судија почетник во Словенија заработува 34 101 евро бруто-плата, или некаде 80 отсто повеќе.
„Бруто-домашниот производ за Македонија е некаде 6,5 илјади евра, а за Словенија е 28 илјади евра. Или, математички, судија почетник во Словенија има 80 отсто поголема бруто-плата од судија почетник во Македонија, при три и пол пати поголем БДП од тој што го имам ние. Каква е пропорцијата тука“,
рече Мицкоски.
Премиерот рече и дека јавноста мора да знае дека претседател на еден суд во државава има плата од околу 180 000 денари или околу 3 000 евра.
„Мојата плата како премиер е 155 000 денари“,
рече тој.
За буџетот на судови во регионот рече дека во Албанија е 0,17 отсто од БДП, ние имаме 0,30 отсто, Молдавија 0,18 отсто, а Грузија 0,15 отсто.
Оваа компаративна анализа, според него, кажува дека буџетот што Владата го издвојува за правосудниот систем е повисок од 75 отсто земји членки на ЕУ.
„Јас апсолутно не гледам потреба за зголемување на таа сума, односно на тој буџет. Што се однесува до делот за одобрување на планот за вработување и унапредување, немам проблем да се одобруваат од страна на Судскиот совет и Владата како небитна, само нека ја информираат. Владата не се меша во судството, но е одговорна за трошењето на секој денар народни пари. Кога тие пари ги троши некој орган од управата на државата, логично е државата да се грижи за тоа“,
рече Мицкоски.
Уште еднаш повтори дека не ја гледа потребата од зголемување на судскиот буџет, кога и самиот Извештај од Советот на Европа констатира дека буџетот што го издвојуваме е повисок како процент од БДП од 75 отсто од земјите членки од ЕУ.
„Во минатото имавме експерименти кога обвинители земаа и по десетпати поголеми плати од тоа што земаа нивни колеги, па знаете како завршија со торбички ‘луј витон’ , со исплатени хонорари, кои се бројат во десетици или стотици илјади евра. Гледаме како заврши правдата“,
вели тој.
На новинарското прашање што има направено Владата во изминатиот период во борбата против криминалот и корупцијата, премиерот посочи дека сега се отвораат истраги и се спроведуваат кривични пријави до правосудните органи.
„Еден врховен судија е фатен на дело како зема мито. Во тој случај заедно е замешан поранешен висок функционер во Обвинителството и во тој момент член на Советот на јавни обвинители, нешто што во минатото беше невозможно. Имаме еден директор во здравствен установа што беше фатен со мито и беше приведен. Имаме директор што е дел од структурата на ВМРО-ДПМНЕ, кој исто така беше фатен со мито и сега е во притвор итн.“,
кажа премиерот.
Посочи дека тој лично, но и Владата не се задоволни од работата на Судскиот совет и на државниот јавен обвинител Љупчо Коцевски и додаде дека логично би било да се бара негова смена.
Според него, и најголемиот дел од граѓаните мислат дека државниот јавен обвинител не си ја врши својата работа доволно добро.
„Ако политичката цена е да ја платам и да бидам повторно дел од извештај во кој ќе бидам критикуван, а притоа буџетот што го добиваат е очигледно поголем од 75 отсто од земјите членки на ЕУ, нивни колеги, тогаш мислам дека некој треба да си го стави прстот на чело и да размисли што прави“,
вели Мицкоски.
На новинарско прашање колку плата треба да зема еден судија, Мицкоски рече дека ако просечната плата во земјава е 45 000, а претседател на суд месечно зема 180 000 денари, што според него е голема сума, тогаш судија треба да зема колку што е премиерската плата или околу 150 илјади денари.