Според него, се проверуваат сите аспекти дали е возможно да се потпие договор за слободна трговија, но доколку е возможно, премиерот рече дека тоа било исклучителен чекор напред, со кој би се потврдило и запечатило стратешкото партнерство помеѓу Македонија и САД
Царините од 33 отсто што ни ги воведоа Соединетите Американски Држави (САД) се очекувани. Тоа беше јасно уште веднаш после инаугурацијата на американскиот претседател Доналд Трамп и тоа тој го кажа. Ова вечерва во гостување на ТВ Алфа го изјави премиерот Христијан Мицкоски, одговорајќи на новинарско прашање што ќе преземе земјата откако вчера американскиот претседател на земјава ѝ воведе царински давачки од 33 проценти, што е половина од 65 проценти македонски царини за американски производи увезени во државата.
„Во нашиот царински тарифник имаме царински тарифник за некои групи на производи што доаѓаат од САД кои повисоки од 60 проценти. Уште во јануари кога бев во САД со тогашниот заменик на помошникот државен секретар, Александар Касаноф разговаравме за потпишување на билатерален договор во рамките на Стратешкиот дијалог меѓу двете земји во делот на економијата и трговијата. Уште тогаш почнавме, знаејќи дека ќе следат вакви процеси. Мислам дека тоа беше вистинскиот пат кој почнавме да го чекориме“,
рече премиерот.
Потоа, како дел од целиот процес од наша страна, Мицкоски посочува дека предложил да се потпише договор за слободна трговија со САД и да нема царини, ниту од едната, ниту од другата страна.
„Дадов налог нашите надлежни институции да видат дали можеме да потпишеме ваков договор согласно важечките договори. Истото му го предложив и на државниот секретар за економија на САД, Хауард Лутник. Денеска на оваа тема во Брисел со Марко Рубио, американскиот државен секретар разговараше и министерот за надворешни работи, Тимчо Муцунски, како и со уште еден висок претставник на Белата куќа, одговорен за Балканот. Од сите страни ова е поздравено како одлична идеја“,
Според него, сега се проверуваат сите аспекти дали е возможно да се потпие договор за слободна трговија, но доколку е возможно, премиерот рече дека тоа било исклучителен чекор напред, со кој би се потврдило и запечатило стратешкото партнерство помеѓу Македонија и САД.
На прашањето како ќе се рефлектира врз нашата земја воведувањето на американските царини кон Европската Унија во износ од 20 отсто, бидејќи ние економски сме најмногу врзани за европскиот континент, премиерот рече дека тоа ќе има секундарни ефекти врз нашата економија, бидејќи не е важна земјата на потекло, туку каде одат парите.
„Очекувам дијалогот меѓу ЕУ и САД, што ќе се развие во периодот што следи, да резултира со договор и дека ќе се изнајдат начин да најдат решение или излез од оваа ситуација“,
кажа тој.
Вели дека според податоците на Државниот завод за статистика во 2024 година во САД имаме извезено стока во вредност од околу 110 милиони евра, а увезено 180 милиони евра.
„Знали ние сме во дефицит. Оваа година во јануари имаме суфицит, имаме извезено околу 21 милион евра, а имаме увезено 12 милиони евра. Како производ најмногу извезуваме автобуси што ги произведува странскиот инвеститор во Скопје. Тие по потекло се од тука, но земјата што ги продава е Белгија, бидејќи таму е седиштето на компанијата. Значи ние ќе го почувствуваме секундарниот ефект, бидејќи Белгија е дел од ЕУ. Не е битна земјата на потекло, бидејќи таму е фактурирањето“,
вели Мицкоски.
Според него, ниту една земја во Европа не може да биде подготвена за оваа состојба.
„Никој не се подготвуваме претходно. Кога проблемот е тука, се седнува на маса и се разговара“,
посочи тој.
Од Владата денеска преку соопштение посочија дека воведените царини од администрацијата на американскиот претседател Доналд Трамп, кои не ја одминаа ниту С Македонија биле очекувана одлука, која, како што велат оттаму, нема да има големо влијание врз нашата економија.
Економиситите што анализираа како ќе влијае воведувањето на царински давачки од администрацијата на американскиот претседател Доналд Трамп посочија дека тоа нема да има значително директно негативно влијание.