Одговарајќи на новинарски прашања по посетата на Соборниот храм во Скопје, премиерот рече дека вака како што се формулирани, членовите 9 и 10 од законското решение се спротивни на Уставот и Законот за употреба на јазиците и најви нивна корекција
Премиерот Христијан Мицкоски денеска најави дека членовите 9 и 10 од Законот за заштита на децата, кои беа оспорени од претседателката на државата, ќе бидат коригирани и вратени во собраниска процедура. Одговарајќи на новинарски прашања по посетата на Соборниот храм во Скопје, премиерот рече дека вака како што се формулирани, овие два члена од законското решение се спротивни на Уставот и Законот за употреба на јазиците.
„Така што, мислам дека е рутина и е формалност. Ќе бидат коригирани и ќе бидат согласно Уставот и Законот за јазиците, ќе бидат повторно вратени во парламентарна процедура и очекувам успешно усвојување на законот. Сите оние коишто влегуваат во рамки на Законот за јазиците, станува збор за сите оние припадници коишто се повеќе од 20-ина проценти, ако го читате овој закон и членовите 9 и 10 вели точно 20 проценти. Малку несмасно е сето тоа направено и тоа е една формулација којашто ќе се надмине многу скоро“,
изјави Мицкоски.
Се знае, рече премиерот, дека службен јазик на целата територија на државата е македонскиот, но сите оние, во случајот Албанци, кои ќе сакаат формуларот за полагање и лиценцата да бидат издадени на албански јазик ќе го добијат тоа право, што соодветно и презицно ќе биде формулирано во Законот за заштита на децата.
Освен премиерот, претходно денеска на темата говореше и претседателката Гордана Сиљановска-Давкова која изјави дека ниту сум имала намера, ниту некогаш ќе употреби вето за да навреди некој јазик или дел од нација. Со ветото, како што појасни, укажала на тоа дека во Законот за заштита на децата не е употребена формулација „јазикот што го говорат најмалку 20 проценти од граѓаните“, како што налагаат Уставот и законите.