Во изјава по средба со Анџелина Ајхорст, лидерот на ВМРО-ДПМНЕ не го користи новото уставно име на државата и вели дека го послушал советот на свој пријател од ЕПП, така што се воздржал од критика кон состојбите во нашата земја и кон Владата и премиерот
Зборувавме за неправдата што им е нанесена на македонскиот народ, на македонската нација и на македонската држава и неможноста да ги почнеме долго очекуваните преговори со Европската Унија. Бидејќи ние како народ и како држава заслужуваме да бидеме дел од европското семејство, вели лидерот на ВМРО-ДПМНЕ Христијан Мицкоски, по неговата денешна средба во Брисел со директорката за Западна Европа, Западен Балкан и Турција во Службата за надворешно-политички работи на ЕУ Анџелина Ајхорст.
Во изјавата по средбата, Мицкоски не го користи повторно новото уставно име на државата и вели дека го послушал советот на свој пријател од ЕПП, така што се воздржал од критика кон состојбите во нашата земја и кон Владата и премиерот Зоран Заев.
Како што соопштија од ВМРО-ДПМНЕ, Мицкоски, на средбата со Ајхорст, рекол дека Македонија треба да го продолжи својот пат кон ЕУ и побарал поддршка за државата. Мицкоски и Ајхорст се согласиле дека местото на Македонија е во ЕУ.
„Тоа што навистина го добив од другата страна како повратна информација е дека желбата, нејзина лична, но и желбата на политичарите овде во Брисел, е навистина да дадат се’ од себе за да му помогнат на македонскиот народ и на македонската нација но, и на Македонија како држава“,
рече Мицкоски во изјава по средбата.
Тој вели дека е навистина задоволен од тоа што го слушнал и, според него, најдоброто и за македонскиот народ и за државата допрва следува.
Делегацијата на ВМРО-ДПМНЕ, на чело со Мицкоски, денеска треба да оствари уште две нови работни средби: со генералниот секретар на Европската народната партија (ЕПП), Антонио Лопез, а потоа со германскиот пратеник во Европскиот парламент Дејвид Мекалистер, кој е од редовите на ЦДУ.
Мицкоски отпатува во Брисел со потпретседателот на ВМРО-ДПМНЕ, Александар Николоски, и со секретарот за меѓународна соработка на партијата, Тимчо Муцунски, за да учествуваат на настан организиран од Европската народна партија.