Европската перспектива на земјата и што треба да се направи да се добие датум за преговори и понатаму членство во ЕУ биле темите на кои утрово на работен појадок разговарале претседателот на Европскиот совет Шарл Мишел и лидерот на ВМРО-ДПМНЕ Христијан Мицкоски.
Како што соопштија од партијата, Мицкоски истакнал дека членството во ЕУ е највисоко на агендата на ВМРО-ДПМНЕ, при што изразил уверување за изборна победа на 12 април.
Мицкоски пред претседателот на Европскиот совет изнел и низа критики на сметка на актуелната власт, која ја обвинил за корупција, криминал и рекет и оневозможување на правдата преку партизирано судство.
„Заклучено е дека мора да има реформи, како на судско, административно, безбедносно, така и на секое друго ниво од значење на државата. Заеднички беше констатирано дека е потребен напредок на Македонија кој ќе биде во корист на граѓаните“, се вели во соопштението од ВМРО-ДПМНЕ.