Од изјавите на историчарите од комисиите дознаваме дека бугарската страна се противи за терминот „македонски“ којшто го означува нашиот идентитет, додека Зоран Заев упорно нѐ убедува дека не преговара за идентитетот и историјата, напиша лидерот на ВМРО-ДПМНЕ Христијан Мицкоски на својот Фејсбук профил, по прес -конференцијата на копретседателите на Мешовитата македонско-бугарска историска комисија.
Од изјавите на историчарите од комисиите дознаваме дека бугарската страна се противи за терминот „македонски“ којшто го…
Posted by Hristijan Mickoski on Friday, December 4, 2020
Тој се повикува на изјавата на бугарската страна дека за придавката „македонски“ се разговара на повисоко ниво, што, според Мицкоски „во превод би значело дека Заев тргува“.
„Та нели сѐ беше во главата на вмровците?Поддршка за нашите историчари да опстојат на вистината. Лажеше додека се колнеше во најмилото и продаваше, лаже и денес“,
напиша Мицкоски во објавата.
Во меѓувреме, ВМРО-ДПМНЕ и попладнево продолжи со протести против разговорите кои власта ги води со Бугарија, на кои повторно побара оставка од премиерот Зоран Заев.
Во рамки на протестот што се одржува под мотото „Оставка на Заев, слобода на народот!“, членови и симпатизери на ВМРО-ДПМНЕ еден час ги блокирааа приодите кон објектите на Владата, МНР и Министерството за правда, а вечерва се протестира и во 20 други градови.
„Ние треба да се срамиме единствено од нив, од Заев, од Бучковски и тие околу него. Имаме двајца докажани криминалци, двајца осудени криминалци кои преговараат за се што е македонско, на кои што овде не им е местото“,
истакна поранешниот генерален секретар на партијата Игор Јанушев, кој говореше на собирот пред Владата.
Пред Министерството за надворешни работи, пак, зборуваше портпаролот на ВМРО-ДПМНЕ Димче Арсовски, додека пред Министерството за правда, Тони Менкиновски.
Освен во Скопје, ВМРО-ДПМНЕ одржа протести и во уште 20 града, како што соопштија од партијата.
