„Овој стопан е од Зајас, се вика Али Ахмети, па ќе видите како низ Македонија во општини каде што, апсолутно, немаат ниту теоретски шанси да освојат градоначалник, тие кандидираат кандидати за градоначалници“, рече лидрот на ВМРО-ДПМНЕ на вечерашниот митинг во Виница
На отворена сцена гледаме како има една непринципиелна коалиција која мораме да ја изнесеме на чистина. Тоа е коалиција којашто ја направија ДУИ и политичката партија Левица, тоа е коалицијата која ја направија Али Ахмети и Димче Апасиев и оваа коалиција е многу опасна, рече претседателот на ВМРО-ДПМНЕ, Христијан Мицкоски на денешниот митинг во Виница во рамките на кампањата за локалните избори закажани за 19 октомври.
„Оваа коалиција е многу опасна. Зошто? Затоа што во минатото ги видовме активистите и членовите на оваа политичка партија Левица како дел од така наречената шарена или обоена револуција кога уништуваа, бојадисуваа, палеа државен имот, кога уриваа држава. Ги видовме понатаму како добиваат скапо платени хонорари од СЈО, последно време сведоци сме како влечат партиски пари за личните удопства и луксузи коишто ги имаат“,
рече Мицкоски.
Тој, во своето обраќање рече дека во минатото поранешниот лидер на СДСМ и експремиер Зоран Заев од собраниската говорница му се обраќал на претседателот на Левица, Димитар Апасиев и му велел дека пред избори се договориле тој да му обезбеди ресурси за да добие некој глас повеќе, а потоа после изборите да бидат заедно во коалиција и да ја спасуваат Македонија од ВМРО-ДПМНЕ и од Христијан Мицкоски.
На ова, како што кажа лидерот на ВМРО-ДПМНЕ, Апасиев ја наведнал главата и си замина од собраниската сала“.
Денес, како што наведе Мицкоски, говорејќи во тој контекст, ги гледаме истите од Левица, само со нов стопан.
„Но, овој стопан е од Зајас, се вика Али Ахмети, па ќе видите како низ Македонија во општини каде што, апсолутно, немаат ниту теоретски шанси да освојат градоначалник, тие кандидираат кандидати за градоначалници, како Тетово, како Гостивар и Струга“,
рече претседателот на ВМРО-ДПМНЕ.
Ако се чувствуваат толку силни и веруваат во себе, рече Мицкоски, зошто не кандидирале кандидат за градоначалник во родниот град на Апасиев – Велес или пак во родниот град на вториот по важност во Левица, (Борислав) Крмов во Штип.
„Одговорот е многу едноставен. Тие таму имаат прокси улога за потребите на ДУИ и имаат за цел да ги акумулираат анти-ДУИ, анти-Али гласовите, со цел да му удоволат на нивниот нов стопан“,
рече Мицкоски.
Затоа, порача тој, на 19 октомври македонските граѓани имаат историска можност да излезат масовно низ цела Македонија да го заокружат бројот 9 и да гласаат за ВМРО-ДПМНЕ и коалицијата.
На митингот во Виница говореше и пратеникот и член на Извршниот комитет на ВМРО-ДПМНЕ, кој рече дека локалната власт е првиот и најблискиот контакт на граѓанинот со институциите. Но, како што додаде тој, локалната власт не може сама да носи големи промени и за тоа, според него, е потребна силна поддршка од Владата која знае да отвора врати, да обезбедува средства и да создава можности.
„Нашата сила е во заедништвото. Кога локалната власт и Владата се на иста страна, кога премиерот е со нас, кога градоначалникот и советниците работат заедно, тогаш нема пречка што не може да се надмине“,
порача Ковачки.
Митко Костадиновски, кандидатот за градонадалник за општина Виница од редовите на ВМРО- ДПМНЕ, на митингот истакна дека изминатите четири години општина Виница ја карактеризирале позитивни промени проследени со многу реализирани проекти и решени проблеми. Тој вети дека ќе работи одговорно, транспарентно и отчетно, со нулта толеранција за корупција и во интерес на граѓаните.
Костадиновски како приоритетни проекти наведе изградба на спортска сала, рехабилитација и реконструкција на градскиот парк, рехабилитација на зелени површини како и проектите во областа на сообраќајот, на патната инфраструктура. Рече дека ќе се донесат нови урбанистички планови и ќе се формира зона за мало стопанство.
„Во делот на урбанизмот ќе работиме на донесување на нови урбанистички планови за Виница и населените места што ќе значат развој на Општина Виница, а наскоро ветуваме формирање на зона за мало стопанство во м.в. Скараница- село Блатец која ќе биде распростанета на површина од 24 хектари и во неа ќе има предвидено 29 градежни парцели за продажба“,
рече кандидатот за градоначалник на Виница од редовите на ВМРО-ДПМНЕ.
