Премиерот во говорот директно не го споменува процесот на евроинтеграции на земјата во изминатата една година влада. Но, им се обрати на оние што велат дека Македонија била понижена и посочи дека тоа се истите што го сменија името, направија договор со Бугарија, што пљачкаа и се потпишуваа на сè што им било поставено на маса
На платото пред владината зграда, под слоганот „Доаѓа времето на Македонија! Ги градиме темелите на промените“, вечерва премиерот Христијан Мицкоски во присуство на министрите се обрати по повод една година влада. Изминатата година ја оцени како тешка, но успешна. Сепак, додаде и дека најдоброто што треба да го испорача овој владин состав допрва доаѓа.
„Секој почеток е тежок. Секој нов почеток е уште потежок, затоа што наследуваш веќе стекната состојба и како што народот вели, не почнуваш од нула, туку од минус. И повторно градиш темели, одново поставуваш столбови и ги засилуваш носечките кои дотогаш биле дотраени, кршени, рушени. Тие нови темели стануваат фундамент на новата иднина која заеднички ја градиме, тие нови темели се секојдневната борба за тебе и твојата иднина. Тие темели треба да го донесат времето на Македонија, времето кое допрва доаѓа. Најдоброто кое допрва ќе се случи. Она што сите го очекуваме, сакаме, заслужуваме и за кое секој ден, се трудиме и чекор по чекор се бориме. Земја на просперитет, ред, развој, почит, човечност, вредности. Земја со која ќе се гордееме, земја која ќе биде на вистинскиот пат, повторно твоја и ќе работи за тебе“,
рече премиерот на почетокот на излагањето.
Во оваа тешка година, посочи дека Владата има резултати што се јасен показател дека стигнала на солидна основа, со реализација и отпочнување на над 250 поголеми проекти.
„И она што денес сакам да го соопштам е дека за повеќе од трипати ќе се зголеми бројот на проекти за следната година. Веќе вклучуваме во петтта, па шеста брзина. И очекувам максималната посветеност во исполнување на програмата, очекувам преку 400 проекти мерки чекори реформи во наредниот период кои ќе бидат насочени на развој и раст, подобар стандард, поквалитетно образование, борба против корупција, инвестиции и реформи во здравството, големи проекти во инфраструктурата, реформи во даночната политика и справувањето со инфлациски и предизвици на животниот стандард, проекти за млади, проекти за земјоделци, проекти за работници, проекти за купување на нов дом, возила, проекти кое ќе го донесат времето за кое сите се надеваме и длабоки промени кои ги заслужуваме“,
кажа тој.
Најголем предизвик во периодот што следува, како што најави Мицкоски, ќе биде овозможувањето систем што ќе може брзо да ја испорача правдата и во кој нема да може да функционира системот на бандитизам создаден од политички и бизнис-структури кои работат во широка коалиција бидејќи, според него, од тоа ќе зависат многу следни политички случувања во државата.
„Во оваа една година отворивме силна борба против криминалот. Се започнаа акции против оние кои порано се сметаа за недопирливи. Денес тие неславни корифеи на неправдата се бегство од законот, а силно се удри и по нарко-бандите, особено во Скопје. Онаму каде сметам дека може подобро е борбата за независно судство и обвинителство, кое сега го немаме“,
рече премиерот.
Посочи дека не е задоволен од динамиката на испорачување на правдата од страна на обвинителите и судиите и додаде дека постојат очигледни спреги меѓу тој свет и светот на политичката бизнис-мафија која го конструирала тој систем.
„Ако ме прашате мене, јас очекувам одговорност и народот очекува одговорност и тоа мора да биде прва работа која ќе нè води, да донесеме правда и да го урнеме тој систем на бандитизам создаден од политички и бизнис-структури за кои нема ни етнички и политички разлики, туку функционираат во широки коалиции. Тоа ќе биде нашиот најголем предизвик во периодот кој следи и од таа динамика ќе зависат многу следни политички случувања во државата“,
вели тој.
Пред крајот на говорот се осврна и на трагедијата во Кочани, за што рече дека е последица на уништениот систем од претходно.
„Таа несреќа, колку и да се трудат политички да ја злоупотребат, е последица на со години руинираниот систем кој беше уништуван и дезавуиран. Јас не можев тоа да го спречам, но ќе направам сè тоа да не се повтори. И како политички фактор од првиот ден испративме реална порака дека правда мора да има и без оглед за кого се работи, мора да биде одговорност. И денес стојам на истиот став, а обвинителството е на тест да докаже вистина и судот да спроведе правда. Но исто така сакам да соопштам дека работиме како влада до обезбедување историски највисок инвестициски пакет за обнова и поддршка на Кочани“,
кажа Мицкоски.
Премиерот во говорот директно не го спомена процесот на евроинтеграции на земјата во изминатата една година влада.
Им се обрати на оние што велат дека Македонија била понижена и посочи дека тоа се истите што го сменија името, направија договор со Бугарија, што пљачкаа и се потпишуваа на сè што им било поставено на маса.
„Нема никогаш повеќе да дозволам да биде понижена, зашто тоа време заврши“,
рече премиерот.