Мицкоски рече оти очекувал од Грција честитка, а наместо тоа „добивме, за жал, политички мускули“. Лидерот на ВМРО-ДПМНЕ посочи дека на заканите за вето на Грција нема да одговори така што ќе ги повтори грешките од минатото, со менување имиња на автопати и градење споменици, туку ќе одговори со повици за меѓусебна соработка и добрососедски односи
Свечената заклетва на претседателката Гордана Сиљановска-Давкова беше достоинствена, оцени денеска лидерот на ВМРО-ДПМНЕ, Христијан Мицкоски, одговарајќи на новинарско прашање како ги коментира бројните критики за тоа што Сиљановска во Собранието, за време на давањето на изјавата, не го употреби уставното име на државата.
Мицкоски рече оти очекувал од Грција честитка, а наместо тоа „добивме, за жал, политички мускули“. Лидерот на ВМРО-ДПМНЕ посочи дека на заканите за вето на Грција нема да одговори така што ќе ги повтори грешките од минатото, со менување имиња на автопати и градење споменици, туку ќе одговори со повици за меѓусебна соработка и добрососедски односи.
Тој ја повика Грција, ако мисли дека имало прекршување на Преспанскиот договор, да не испраќа пораки со закани, туку да се обрати пред Меѓународниот суд на правдата.
„Не очекувам односите меѓу двете држави да се темелат на политички услови. Очекувам да имаме добри, одлични меѓусоседски односи. Ценам дека како ВМРО-ДПМНЕ, а и тамошната влада предводена од Нова демократија, имаат свој став во врска со Преспанскиот договор, ниту на едните ниту на другите ни се допаѓа тој договор. За разлика од таму, Преспанскиот договор тука е дел од македонскиот устав и закони. Многу пати во минатото сме кажале дека тоа е реалност“,
изјави Мицкоски пред затворањето на Самитот „Македонија 2025“.
Што се однесува до употребата на уставното име на државата, тој нагласи дека комуникацијата во институциите и меѓу институциите останува согласно законот, „но мое човеково право е како јас мојата држава ќе ја нарекувам“.
„И додека давам изјави и додека се обраќам пред вас новинарите, јас, а очекувам тоа да биде и начин на однесување на претседателката Сиљановска, да се користат термините ‘Македонија’ и придавката ‘македонски’ бидејќи на тој начин, според нашето толкување на Преспанскиот договор, немаме прекршување на истиот. Ја користам оваа прилика да испратам порака до нашите пријатели во Грција, да престанеме со закани и со опструкции и со враќање назад во минатото, да гледаме напред во иднината. Ова се документи што се дел од правото. Ако тие мислат дека ние сме го прекршиле Преспанскиот договор, тогаш постои меѓународен суд за правда, може да отпочнат процес, па таму ќе ги вкрстиме и едните и другите аргументи. Не би сакал да дојде до тоа“,
изјави лидерот на ВМРО-ДПМНЕ.
Мицкоски нагласи дека нема да ги повторат грешките од минатото во односот со Грција, и повика на пријателски односи и меѓусебна соработка.
„Ако некој очекува од ВМРО-ДПМНЕ да ги повтори грешките од минатото, ве уверам дека тоа нема да го направиме. Ние немаме намера на нивните политички мускули да реагираме на начин што ќе ги промениме имињата на автопатите, на аеродромите или да градиме споменици. Ние само би сакале да бидеме среќни, да биде ратификуван протоколот за економска соработка меѓу двете држави. Ги канам грчките компании да инвестираат во Македонија и македонските компании да инвестираат во Грција. Така треба да соработуваат партнери, сакам да видам ваков вид на соработка. За жал, нема втора можност за прв впечаток, а за жал, првиот впечаток од нашиот сосед, наместо честитка за убедливиот триумф и на ВМРО-ДПМНЕ и на Сиљановска, видовме една отворена сцена политички мускули, иако тоа сè што е дел од Преспанскиот договор во целост, за жал и отповеќе, е имплементирано тука во Македонија, а од тоа што можеме да видиме што се случува кај нашиот јужен сосед, основните три работи кои требале да ги завршат, за жал не ги завршиле“,
изјави Мицкоски.
Како што рече, тој очекува во најскоро време да се видат со грчкиот премиер и да разговараат за соработка во делот на економијата, туризмот, образованието итн.