Премиерот денешниот празник го честита и преку објава на социјалните мрежи, во која наведе дека Божиќ е ден кога тишината зборува погласно од зборовите и ден кога се потсетуваме на она што навистина нè држи заедно – семејството, верата, солидарноста и меѓусебната почит
Премиерот Христијан Мицкоски денеска на православните христијани во Македонија им го честита празникот Рождество Христово – Божиќ, посакувајќи им, како што кажа, пред сè здравје, среќа и мир во домот.
„Тоа е она што ни е потребно. И тоа е она што мислам дека е важно во годината што следи“,
рече тој.
Мицкоски, кој присуствуваше на централната божиќна литургија во Соборниот храм „Свети Климент Охридски“, во изјава за медиумите, по нејзиното завршување, меѓу другото, од новинарите беше прашан и кај кого се паднала паричката на бадниковата вечера во неговото семејство.
„Па, паричката оваа година се падна кај мене“,
одговори тој.
Инаку, премиерот и лидер на ВМРО-ДПМНЕ вчера на неговиот фејсбук-профил објави фотографија од бадниковата вечера, која, како што наведе, традиционално била кај неговите родители. Но, за разлика од лани кога соопшти дека паричката се паднала кај неговиот син Антониј, оваа година тој во објавата упати само честитка по повод празникот Божиќ, наведувајќи дека ова се празници на љубов, дарување и почитување.
Мицкоски денешниот празник го честита и преку објава на социјалните мрежи, во која наведе дека Божиќ е ден кога тишината зборува погласно од зборовите и ден кога се потсетуваме на она што навистина нè држи заедно – семејството, верата, солидарноста и меѓусебната почит.
Како што додаде тој во честитката, Христовото раѓање нè враќа кон суштинските вредности што со векови го обликувале карактерот на нашиот народ, како и дека Божиќ нè потсетува дека силата на едно општество започнува во домот, дека стабилната држава се гради врз здрави семејства и дека иднината ја чуваме преку грижата за најмладите.
„Во време на брзи промени и многу предизвици, овој празник нè повикува да застанеме, да размислиме и да се вратиме кон вредностите што нè одржале: солидарноста, заемната грижа и одговорноста кон ближниот. Посебно место имаат семејствата и децата. Грижата за семејствата е грижа за иднината на Македонија. Децата заслужуваат сигурност, внимание, воспитување и средина во која ќе растат со јасни вредности, чувство на припадност и надеж. Нашата обврска е да создаваме услови во кои секое дете ќе има шанса за достоинствен живот, а секое семејство поддршка и почит“,
наведе премиерот.
Тој додаде и дека Бижиќ е потсетник за важноста на единството, наведувајќи во тој контекст дека само како заедница што се почитува, се слуша и си помага, можеме да одговориме на пердизвиците и да градиме стабилна, праведна и сигурна држава.
„На сите православни христијани им посакувам мир во домовите, здравје и спокој во семејствата и сила да продолжиме уште посилно, со одговорност и со достоинство. Христос се роди!“,
честита премиерот.